1 avqust 2013 20:38
Üç azərbaycanlı futbolçu meydana çıxdı, qol vurulmadı
Bu gün Türkiyə PTT Birinci Liqasında çıxış edən “Orduspor” və “Kahramanmaraşspor” klubları yoxlama oyununda üz-üzə gəliblər. Azerisport.az xəbər verir ki, azərbaycanlı futbolçuların növbəti duelində hesab açılmayıb.
“Orduspor”un heyətində futbol üzrə Azərbaycan millisinin hücumçusu Branimir Subaşiç start heyətdə meydana çıxıb. “Kahramanmaraşspor”da çıxış edən futbolçularımızdan Fərid Quliyev isə fasilədən sonra mübarizəyə qoşulub. Onunla yanaşı bu görüşdə daha bir azərbaycanlı futbolçu çıxış edib. Bu, sözügedən klubda baxışda olan qapıçı Davud Kərimidi. O da fasilədən sonra oynamaq şansı qazanıb. Murad Axundzadə isə meydana çıxmayıb.
Oyuna gəlincə, güclü yağış altında keçirilən görüşü sona çatdırmaq mümkün olmayıb. Hakimlər 80-ci dəqiqədə matçı erkən başa vurmaq məcburiyyətində qalıblar.
