1 avqust 2013 14:22
Berti Foqts klublarımızın baş məşqçiləri ilə qalmaqalından danışdı
Futbol üzrə Azərbaycan milli komandasının baş məşqçisi Berti Foqtsla Premyer Liqa klublarının çalışdırıcıları arasındakı son görüşlərin birində narazılıq yaranıb. Azerisport.az xəbər verir ki, bu barədə almaniyalı mütəxəssis ölkəsinin mətbuatına açıqlamasında özü məlumat verib.
İlin sonunda AFFA ilə müqaviləsi başa çatacaq, bu səbəbdən millimizdən göndəriləcəyi gözlənilən Foqts komandamızın uğursuzluqlarının səbəbini klublarda görür. O, klubların qitə miqyaslı yarışlarda uğursuz çıxış etdiyini, hazırda yalnız “Qarabağ”ın mübarizəni davam etdirdiyini deyərək Ağdam təmsilçinin də çox uzaga gedə bilməyəcəyini söyləyib. Alman mütəxəssis bildirib ki, klublar uğurzuz çıxış etdiyi halda millidən nəsə gözləmək doğru deyil.
Foqts klublardakı həmkarları ilə münasibətlərinin pis olduğunu etiraf edib. Onun sözlərinə görə, həmin məşqçilərlə son görüşü zamanı onlar iradlarını bildiriblər: “Məni alman rəhmsizliyi ilə işləməkdə ittiham etdilər. Bu üzdən mən də sakitcə durdum və yığıncağı tərk etdim”.
