1 avqust 2013 15:57
İlk dəfə qələbə ilə başlamaq arzusu
Azərbaycan Premyer Liqasında 2013/14 mövsümünün startına artıq 1 gün qalır. Azerisport.az xəbər verir ki, sabah keçiriləcək ilk oyunla yeni mövsümün "qırmızı lenti kəsiləcək”.
"Rəvan” 1-ci tur çərçivəsində Qəbələyə səfər edəcək. Komandanın rəqibi adıçəkilən şəhərin eyniadlı kollektivi yox, "Simurq” olacaq. İş ondadı ki, Zaqatala şəhər stadionunda təmir işləri tam yekunlaşmadığından "Simurq” ilə səfər oyunu Qəbələdə keçiriləcək.
İlk dəfə 10 komandanın iştirakı ilə 4 dövrədə keçiriləcək çempionatın startı ərəfəsində “Rəvan”ın ilk matçı ilə bağlı statistik məqamlara nəzər salmaq pis olmazdı. Bakılılar Zaqatala təmsilçisi ilə indiyədək 6 dəfə görüşüb. İlk 4 qarşılaşmanın hamısı "sülh”lə başa çatıbsa, son 2 matçda “aslanlar” xalsız qalıb. Ən son görüşdə isə “Simurq” texniki qələbə sayəsində üstün olub. Topların fərqində də “Rəvan” geridi – 3:5.
Digər tərəfdən bu, “Rəvan” üçün ardıcıl 3-cü Premyer Liqa mövsümü olacaq. İlk halda – 2011/12 mövsümünə məğlubiyyətlə (Kəpəz – 2:3) başlayan paytaxt təmsilçisi ötən mövsüm heç-heçə (Xəzər Lənkəran – 1:1) ilə start götürmüşdü. Bu hesabla növbəti start qələbə ilə olmalıdı. (klub saytı)
