2 avqust 2013 12:55
Anar Salmanov idarə etdi, Tromse qələbə qazandı
Azərbaycanlı hakimlər Avropa Liqasında daha bir oyun idarə ediblər. Azerisport.az xəbər verir ki, Anar Salmanovun başçılıq etdiyi hakimlər briqadası qitənin nüfuzuna görə ikinci dərəcəli klub turnirinin üçüncü təsnifat mərhələsində “Tromse” (Norveç) – “Differdange” (Lüksemburq) oyununda ədalət təmsilçisi olublar.
Salmanov 76-cı dəqiqədə Zdenek Ondraşekin qolunu qeydə alıb və bununla da “Tromse” ev oyununda 1:0 hesablı qələbə qazanıb. FİFA referimiz 90 dəqiqə ərzində 3 sarı vərəqə qeydə alıb. Meydan sahiblərindən Adnan Kauseviçə (65-ci dəqiqə) xəbərdarlıq edən Salmanov qonaqlardan Qautyer Karon (63) və Tom Syebenaleri cəzalandırıb.
Qeyd edək ki, bu oyunda Salmanova Zeynal Zeynalovla Rza Məmmədov yardım edib. Matçın dördüncü hakimi Rəhim Həsənov olub.
Onu da xatırladaq ki, “Tromse” Avropa Liqasının ikinci təsnifat mərhələsində “İnter”i mübarizədən kənarlaşdırıb. Evdə 2:0 hesablı qələbə qazanan Norveç təmsilçisi Bakıda 0:1 hesabıyla uduzsa da, mərhələ keçən tərəf olub.
