3 avqust 2013 12:16
Rəvan Qəbələdə son məşqə çıxdı (FOTOLAR)
Topaz Premyer Liqasının ilk turu çərçivəsində "Simurq” ilə üz-üzə gələcək "Rəvan” bu oyuna hazırlığı başa vurub. Azrisport.az xəbər verir ki, komanda bu gün Qəbələdə axşam saatlarında son məşqini keçirib.
Uzun yol yorğunluğunu təxminən 3-4 saatlıq istirahətlə çıxardıqdan sonra Qəbələ şəhər mərkəzi stadionuna yollanan komanda 1 saata yaxın müddətdə məşq edib. Futbolçuların isinmə hərəkətləri ilə start götürən hazırlıqda toplu çalışmalara daha böyük diqqət ayrılıb. Ardından "kvadratlar”la dar sahədə topu özündə saxlamaq qabiliyyətini nümayiş etdirən futbolçular məşqin sonunda asmaların qapanması və qapıya zərbələr üzərində də işləyib.
Qeyd edək ki, "Simurq” ilə matçın Qəbələdə baş tutması Zaqatala şəhər stadionunda aparılan təmir işlərinin tam yekunlaşmaması ilə əlaqədardı. Qəbələ şəhər stadionunda keçiriləcək qarşılaşmanın bu gün saat 18:30-da başlayacağını da qeyd edək.
