5 avqust 2013 12:22
Aleksandr İaşvili: İnter bunu bacarmalıdı
“İnter”in gürcüstanlı hücumçusu Aleksandr İaşvili Premyer Liqanın 1-ci turunda “Qarabağ”la (1:2) keçirilən matçdan dərhal sonra oyunla bağlı klub saytına müsahibə verib. Azerisport.az sizi həmin müsahibə ilə tanış edir.
- Matç kifayət qədər maraqlı alındı. “İnter” erkən qol vurdu, lakin bu üstünlüyünü saxlaya bilmədi. Bundan başqa, fasilədən sonra komanda daha bir qol buraxdı. Mövsümün ilk oyunu barədə nə deyə bilərdiniz?
- Oyuna pis başlamadıq. Bizə erkən qol vurmaq müyəssər oldu. Lakin sonra matçın senarisi dəyişdi. “Qarabağ” vəziyyətlərindən istifadə etdi və qalib gəldi. Amma deməzdim ki, rəqib bizdən yaxşı təsir bağışlayırdı. Sadəcə onlar qol vəziyyətlərini reallaşdırdılar, biz isə yox. Bizim belə vəziyyətlərimiz daha çox oldu. Ancaq nə etmək olar, futbol belədi.
- Məğlubiyyətin əsas səbəbini nədə görürsünüz?
- Qeyd etdiyim kimi, biz oyuna yaxşı başladıq. Birinci hissədə oyunun gedişinə tam nəzarət etdik, “Qarabağ” yalnız qapımıza tərəf bir necə zərbə endirdi. Lakin sonra biz kobud səhvlərə yol verdik və rəqib də bundan istifadə etdi. “Qarabağ”ın heyətində bu səhvlərdən istifadə edəcək yaxşı icraçılar çoxdu.
- “İnter” birinci hissədə nümayiş etdirdiyi oyun ritmini niyə ikinci hissədə davam etdirə bilmədi?
- Düşünürəm ki, bizə sonuncü ötürmə çatışmırdı. Bundan başqa, bizim ixtiyarımızda daha inamla və daha dəqiq istifadə etməli olduğumuz daha çox standart vəziyyətlər vardı. Qapılara doğru daha çox zərbə endirmək lazım idi. Bir sözlə, çempionatın ilk oyununda uduzmağımız pis oldu, özü də birbaşa rəqibimizə məğlub olmağımız daha pisdi. Bununla belə, önümüzdə tam mövsüm var, vəziyyəti yaxşılaşdırmaq üçün kifayət qədər vaxt var.
- Rəqibin heyətində Almaniyanın “Bohum” komandasında birlikdə çıxış etdiyiniz Nikolas Gelaşvili də meydana çıxmışdı. Maraqlıdı, siz bu oyunu onunla müzakirə etmişdiniz? Keçmiş klub yoldaşınızı bu qələbə münasibətilə təbrik etdiniz?
- Etiraf edim ki, bu oyunadək onunla əlaqə saxlamamışdıq. İstənilən matça tam diqqətlə yanaşmaq lazımdı. Bu barədə yalnız oyundan sonra danışmağın lazım olduğunu düşünürəm. Oyundan sonra, əlbəttə ki, onu təbrik etdim. Axı futbol belədi ki, kimsə qalib gəlir, kimsə uduzur. Əlavə edim ki, biz mövsümün ilk oyununda qalib gəlməyi çox istəyirdik, lakin alınmadı.
- İndi komandaya bu məğlubiyyəti tez unutmaq və irəliyə doğru addımlamaq lazımdı...
- Təbii, komanda bunu etməyi bacarmalıdır. Bizə bu məğlubiyyətdən qısa zaman ərzində uzaqlaşmaq və yeni fikirlərlə növbəti oyunlara yanaşmaq lazımdı.
- İkinci turda “İnter”i “Qəbələ”nin timsalında daha bir təhlükəli rəqib gözləyir. Bu səfər oyunu barədə nə düşünürsünüz?
- “Qəbələ” güclü komandadı. Onlar bizim birbaşa rəqiblərimizdən biridir. “Qəbələ” eynilə “Qarabağ” kimi, Azərbaycanda ən ambisiyalı komandalardan biridir və onlarla oyunda bizə asan olmayacaq. Lakin bu komandaya qarşı oyunda vacib olan nəticəni əldə etmək üçün əlimizdən gələni edəcəyik.
