6 avqust 2013 14:31
“Tezliklə milliyə qayıdacağımı gözləyirəm”
Futbol üzrə Azərbaycan millisinin qapıçısı Andrey Popoviçin çıxış etdiyi Türkiyənin “Tavşanlı Linyitspor” klubu ötən gün növbəti yoxlama oyununu keçirib. Azerisport.az xəbər verir ki, onun komandası “Kahramanmaraşspor”la qarşılaşıb.
Matç qolsuz heç-heçə ilə yekunlaşıb. 90 dəqiqə meydanda olan Popoviç penaltini dəf etməklə komandasının yenilgidən xilas edib.
Gənc qolkiper bu oyunla bağlı fikirlərini saytımıza açıqlayıb: “Prinsipcə, yeni komandamda hər şey yaxşıdı. Tezliklə təlim-məşq toplanışı başa çatacaq və yeni mövsümə start veriləcək. Toplanışı yaxşı keçirmişəm. Ötən gün yoxlama oyununda hətta penaltini dəf etməklə komandamın qol buraxmamasında pay sahibi oldum. Ümid edirəm ki, əsas heyətdə sabit oyun nümayiş etdirə biləcəm. Tezliklə Azərbaycan yığmasına qayıtmağımı gözləyirəm”.
Qeyd edək ki, “Tavşanlı Linyitspor”da Azərbaycan yığmasının sabiq üzvlərindən Usim Nduka, eləcə də bu yay “Qəbələ”dən ayrılan Mustafa Dabo da çıxış edir. “Kahramanmaraşspor”da isə Fərid Quliyev, Murad Axundzadə və Davud Kərimi top qovur.
