7 avqust 2013 18:54
İspaniya yığması ilə AÇ-ni qazanan futbolçular rəsmən Bakıda! (FOTO)
“Bakı” daha iki futbolçu ilə müqavilə imzalayıb. Azerisport.az xəbər verir ki, bunlar keçidi xeyli müddət idi gündəmdə olan ispaniyalı futbolçular - Mario Alvares və Ruben Qonsalesdi.
Klubun rəsmi saytının yaydığı məlumata görə, onların hər ikisi ilə 2 illik müqavilə bağlanılıb.
Mario Alvares kimdi?
Bu futbolçu 1982-ci ildə, fevralın 2-də İspaniyanın Tenerife şəhərində anadan olub. 31 yaşlı müdafiəçi Madrid “Atletico”sunun yetirməsidi. Amma o, peşəkar karyerasına 1999-cu ildə “Amoros”da başlayıb. 2000/01 mövsümündə “Atletico”nun B komandasında 28 oyun keçirən müdafiəçi 2001-2006-cı illər aralığında “Valladolid”də forma geyib. Burda 90 oyuna 3 qol da vuran futbolçu 2003-2004 mövsümündə “Barcelona”ya icarə verilib. Lakin o, bu klubda cəmi 1 matça çıxıb. 2006-2007 mövsümündə Alvarez “Recreativo”nun uğurları üçün çalışıb (24 oyun, 1 qol). 2007-2011-ci illər aralığında “Getafe”də 59 oyuna çıxan futbolçu 2011-ci ildən “Betis”də idi. O, son klubunda 32 oyuna çıxıb və 1 dəfə fərqlənib.
Alvarez vaxtilə İspaniyanın U-16, U-17, U-18 və U-21 yığmalarında da çıxış edib. U-16-nın heyyətində Avropa Çempionu titulunu qazanıb.
Ruben Qonsales Roşa kimdi?
Ruben 1982-ci ildə, yanvarın 29-da İspaniyanın Santyaqo De Kompostela şəhərində anadan olub. Madrid “Real”ının yetirməsi olan 31 yaşlı Roşa peşəkar karyerasına 2001-ci ildə məhz bu klubun B komandasında başlayıb. 87 oyunda 4 qol vuran müdafiəçi həmin 2006-cı ilədək çıxış etdiyi “Real”ın əsas heyətində də 4 oyuna çıxıb. 2004-cü ildə Ruben Qonsales Almaniyanın “Borussia” (Münhenqladbax) klubuna icarəyə verilsə də, burda cəmi 3 oyun keçirib. 2004-2005 mövsümündə bu futbolçu “Albacete”də də icarə əsasında 22 oyuna çıxıb. 2006-cı ildə isə o, “Racing”ə transfer olunub. Burda 34 oyuna 2 qola imza atan Roşa növbəti ilə “Celta”ya keçib və 2009-cu ilədək 70 qarşılaşmada 1 qol vurub. 2009-2011-ci illər aralığında o, “Mallorca”da çıxış edib (31 oyun, 3 qol). 2011-ci ildən çıxış etdiyi “Osasuna”da isə cəmi 26 oyun keçirib.
Mario Alvares kimi, Roşa da İspaniyanın bir neçə aşağı yaş qrupundan ibarət yığmasında çıxış edib. Belə ki, o, U-16, U-17, U-18, U-20 və U-21-də forma geyib. Qonsales də U-16 ilə Avropa Çempionu titulunu qazanıb.
