8 avqust 2013 01:59
Qarabağ məşq etdi, Gözəl futbolçularla görüşdü, Qurbanov danışdı
“Qarabağ “Gefle” ilə oyuna hazırdı. Azerisport.az xəbər verir ki, Avropa Liqasının üçüncü təsnifat mərhələsi çərçivəsində İsveç komandasıyla cavab görüşünə çıxacaq təmsilçimiz Bakı vaxtı ilə 22:00-da məşqə çıxdı.
Oyunun keçiriləcəyi “Norrporten Arena”dakı məşq 1 saat davam etdi. Ənənəvi olaraq baş məşqçi Qurban Qurbanov futbolçuları çox yükləmədi. Müəyyən toplu hərəkətlərin ardından “kvadrat” oynanıldı. Vüqar Nadirov fizioterapevt nəzarətində xüsusi olaraq çalışdı.
Məşqi izləyənlər arasında “Qarabağ”ın vitse-prezidenti Tahir Gözəl də vardı. O, məşq bitəndən sonra yaşıl meydançadaca da komandayla görüşdü. Bütün Azərbaycanın “Qarabağ”dan qələbə gözlədiyini bildirən klub rəsmisi onlara inandığını bildirdi. Sonra Tahir Gözəl hər bir futbolçuyla görüşərək onlara uğur arzuladı.
“Qarabağ”ın baş məşqçisi Qurban Qurbanov da oyun öncəsi fikirlərini açıqladı: “Gefle” ilk oyunda göstərdi ki, sıradan bir komanda deyil. Bizimlə doğma meydanda başqa cür oynayacaqlar. 3-4 fərqli sxemli oyun üslübları var. Hər bir şeyə hazır olmalıyıq. 90 dəqiqə, lazım olsa, daha çox oyun intizamını pozmamalıyıq. Tur üçün mübarizə aparacağıq. Amma sona qədər döyüşmək lazımdı. Rəqib uzunboylu futbolçulardan ibarətdir. Bundan istifadə etməyə çalışacaqlar. İstənilən halda biz də özü oyunumuzu göstərməyə çalışacağıq”. (klub saytı)
