9 avqust 2013 03:12
Qarabağ rekordlarını yenilədi
UEFA Avropa Liqasının üçüncü təsnifat mərhələsi çərçivəsində İsveçin “Gefle” klubu ilə cavab oyununda 2:0 hesablı qələbəyə imza atan “Qarabağ” özünə məxsus olan rekordunu yeniləyib. Azerisport.az xəbər verir ki, Ağdam təmsilçisi avrokuboklarda ardıcıl yeddi oyunda uduzmayan yeganə Azərbaycan klubu kimi tarixə düşüb.
Sonuncu dəfə 2011/12 mövsümündə Belçikada “Brügge”yə 1:4 hesabı ilə uduzan Qurban Qurbanovun komandası o zamandan bəri məğlubiyyət nə olduğunu bilmir. 2012/13 mövsümündə avrokuboklara vəsiqə əldə edə bilməyən “Qarabağ” bu mövsüm uğurlu çıxışı ilə diqqət çəkir. İlkin təsnifat mərhələsində Makedoniya “Metallurh”una hər iki oyunda eyni hesabla (1:0) qalib gələn Ağdam klubu ikinci mərhələdə Polşa “Piast”ını (2:1, 2:2) da məğlubiyyətsiz keçdi. “Gefle”yə də hər iki oyunda (1:0, 2:0) qalib gələn komandamız avrokuboklarda məğlubiyyətsiz oyunlarının sayını 7-yə çatdırıb.
Ağdam təmsilçisi eyni zamanda cari avrokuboklar mövsümündə 5-ci qələbəsini qazanıb. Bu isə avrokuboklar tarixində klublarımızın heç birinə qismət olmayıb. Bundan əvvəlki rekord da “Qarabağ”a məxsus idi. 2010/11 mövsümündə 4 qələbə qazanan komandamız cari mövsümdə nəinki bu bu rekordu təkrarladı, hətta yeni rekorda imza atdı. Bu, Azərbaycan klublarının bir mövsümdə qazandığı qələbələrin sayına da aiddi. Ağdamlılar bir mövsüm təmsilçilərimizin qazandığı qələbə sayını 8-ə çatdırmaqla daha bir rekorda öz imzasını yazdırmış oldu. Digər üç qələbədən biri “Xəzər Lənkəran”a, ikisi isə “İnter”ə məxsusdu.
Qeyd edək ki, “Qarabağ” həm də Avroliqanın pley-off mərhələsinə üçüncü dəfə çıxmağı bacaran ilk komandamız oldu. 2009/10 mövsümündə “Twente” (Hollandiya), 2010/11 mövsümündə “Borussia” (Dortmund) klubuna uduzan Ağdam təmsilçisinin bu dəfə hansı aqibətlə üzləşəcəyi böyük maraqla gözlənilir. Ümid edək ki, üçüncü cəhd uğurlu alınacaq və ötən il “Neftçi”nin imza atdığı bu uğura daha bir klubumuz imza atacaq.
“Qarabağ”ın məğlubiyyətsizlik seriyası:
2011/12
Qarabağ - Brügge (Belçika) - 1:0
2013/14
Qarabağ - Matellurg (Makedoniya) - 1:0
Matellurg (Makedoniya) - Qarabağ - 0:1
Qarabağ - Piast (Polşa) - 2:1
Piast (Polşa) - Qarabağ - 2:2
Qarabağ - Gefle (İsveç) - 1:0
Gefle (İsveç) - Qarabağ - 0:2
