9 avqust 2013 14:14
Azərbaycanlı futbolçu Juventusda baxışdan uğurla keçdi
10 yaşlı azərbaycanlı qapıçı Eldar Tağızadə İtaliyanın “Juventus” klubunun düşərgəsində növbəti təlim-məşq toplanışında olub. Azerisport.az xəbər verir ki, yeniyetmə futbolçumuz ötən il də Turin klubunun bazasında olmuş, öz həmyaşıdları ilə oxşar təlim-məşq toplanışında iştirak etmişdi.
Görünür məhz həmin vaxt italiyalı məşqçilərin diqqətini çəkən Tağızadə yenidən Turinə dəvət olunub. O, əsas komandanın da məşq keçdiyi “Juventus”un bazasında hazırlıq keçib. Bir həftə ərzində o, müxtəlif ölkələrdən dəvət olunmuş 8-14 yaş aralığında yeniyetmə futbolçularla birgə məşq edib. Toplanış zamanı digər futbolçular kimi, Eldar da gün ərzində iki dəfə olmaqla saat yarımlıq hazırlıq keçib. Tağızadə bu məşqlərdə özünü yaxşı tərəfdən göstərə bilib və italiyalı mütəxəssislər onu öz yaş qrupunda ən yaxşı adlandırıblar. Ona hətta yaxşı qiymətlə diplom da təqdim olunub.
Məşqçilər Eldara izah ediblər ki, o, gələcəkdə “Juventus”da çıxış etmək üçün öz üzərində mütəmadi çalışmalıdı. Bunun üçün isə futbolçumuzun dörd il vaxtı var. Çünki Turin klubunda ən kiçik yaş qrupu U-14-dü.
Sonda onu da qeyd edək ki, Tağızadə “Neftçi”nin şərəfini qoruyur. O, 10 yaşında 154 sm boya malikdi.
