9 avqust 2013 15:47
Miro Varvodiç: Qarabağ Avropa səviyyəli komandadı
“Qarabağ”ın qapıçısı Miro Varvodiç Avropa Liqasının üçüncü təsnifat mərhələsi çərçivəsində İsveçin “Gefle” klubu ilə cavab oyunundan sonra fikirlərini açıqlayıb. Azerisport.az saytına müsahibəsində o, 2:0 hesabıyla başa çatan görüşdən sonra bunları dilə gətirib:
“Biz çox yaxşı oynadıq. Layiqli şəkildə qələbə qazandıq. Əslində bizim üçün ən vacib olan mərhələ adlamaq idi. Buna nail olduq. Səfərdə də qələbə qazanmağımız isə bir qədər də xoş oldu. İndi biz qrup mərhələsinə daha yaxınıq”.
Xorvatiyalı qapıçı Sundsvalldakı oyunda qol buraxmamasına görə komanda yoldaşlarına təşəkkürünü bildirib: “Rəqibin də bir neçə təhlükəli qol vəziyyəti oldu. Amma bu oyunda işimin o qədər də çətin olduğunu deməzdim. Bunda komanda yoldaşlarımın zəhməti çoxdu. Biz bütün 90 dəqiqə ərzində oyuna nəzarəti əlimizdə saxlamağa çalışdıq. Belədə “Gefle” istədiyi hücumları təşkil edə bilmədi”.
24 yaşlı qolkiper İsveç təmsilçisi üzərindəki qələbələrdən sonra pley-off öncəsi də optimist danışıb: “Artıq üç mərhələ keçmişik. Buna görə çox şadam. Fikrimcə, bu, yaxşı göstəricidi. İndi inanıram ki, biz qrup mərhələsinə də düşə bilərik. Buna sadəcə inanmıram, həm də əminəm”.
“Qarabağ”ın qapıçısı bu uğuru komandasının çəkdiyi zəhmətin bəhrəsi hesab edir: “Mən hələ “Qarabağ”la müqavilə bağlayanda bu komanda ilə avrokuboklarda uğurlu çıxış edəcəyimizi gözləyirdim. Bütün komanda yoldaşlarım məşqlərdə var gücü ilə çalışır. Hər kəs həm məşqlərdə, həm də oyunlarda yüz faiz əlindən gələni etməyə çalışır. Bizim səviyyəli və çox əla məşqçimiz var. “Qarabağ” məhz bunların sayəsində əsl Avropa səviyyəli komandadı”.
