14 avqust 2013 13:34
AFFA legioner limitini yenə də dəyişdi, elitanı tərk edəcək komandaların sayı dəqiqləşdi
Bu gün AFFA İcraiyyə Komitəsinin növbəti iclası keçirilib. Azerisport.az xəbər verir ki, iclasda bir neçə məsələ müzakirə olunub və mühüm qərarlar qəbul edilib.
Əsas müzakirə mövzularından biri legioner limiti olub. Müzakirələrdən sonra İcraiyyə Komitəsi Premyer Liqada legioner limitini yenə dəyişməyə qərar verib. Yeni qərara əsasən, növbəti mövsümdən Azərbaycan çempionatında bir matçda əsas heyətdə yeddi yox, altı legioner oynayacaq. Digər beş futbolçu isə yerli olmalıdı. Onlardan ikisinin yaşı 21-i keçməməlidi.
Qeyd edək ki, hazırda legioner limiti 7+3-1-di. Belə ki, əsas heyətdə 7 əcnəbi meydana çıxa bilər. 4 yerli futbolçudan biri isə 21 yaşından aşağı olmalıdı.
İcraiyyə Komitəsi Premyer Liqanı bir komandanın tərk etməsinə qərar verib. Belə ki, cari mövsümü 10-cu pillədə bitirən komanda növbəti mövsümə Birinci Divizionda başlayacaq. Aşağı liqanın qalibi isə Premyer Liqada çıxış edəcək.
Birinci divizionda 21 yaşadək futbolçulara görə tətbiq olunan limit də dəyişdirilib. Onların sayı səkkizdən altıya endirilib.
