15 avqust 2013 11:44
Sumqayıt şəhər kubokunun qalibi Mərdəkan oldu
Çimərlik futbolu üzrə “Sumqayıt şəhər kuboku” turnirinə yekun vurulub. Azerisport.az xəbər verir ki, 8 komandanın qatıldığı yarışda Sumqayıtla yanaşı Bakı komandaları güclərini sınayıb.
2 qrupa bölünən iştirakçılardan “Dəniz” FK, “Corat Bələdiyyəsi”, “Çingiz” və “Mərdəkan” komandaları uğurlu çıxış edərək yarımfinala vəsiqə qazanıblar. “Corat bələdiyyəsi” və “Mərdəkan” komandaları rəqiblərini müvafiq olaraq 4:3 və 5:3 hesablı üstələyərək finalda iştirak etmək hüququ əldə ediblər.
Paytaxtın Xəzər rayonunu təmsil edən “Mərdəkan” komandası gərgin idman mübarizəsi şəraitində keçən qarşılaşmada “Corat bələdiyyəsi”ni 3:2 hesabı ilə məğlub edərək “Sumqayıt şəhər kuboku”nun qalibi olub.
Təltifetmə mərasimində iştirak edən Şimal Regional Futbol Federasiyasının və Azərbaycan Çimərlik Futbol Federasiyasının nümayəndələri qalib komandalara kuboklar, diplomlar veriblər. Həmçinin turnurin ən yaxşı oyunçusu, ən yaxşı qapıçısı, ən yaxşı müdafiəçisi və ən yaxşı yarımmüdafiəçisinə diplomlar təqdim edilib. Mərasimdə çıxış edən komandaların rəhbərləri yarışın təşkilində əməyi olan AFFA, AÇFF və ŞRFF-yə öz təşəkkürlərini bildiriblər.
