18 avqust 2013 00:27
İvan Benites: Mənə elə gəlir ki, Azərbaycanda çoxdan yaşayıram
“İnter”in ispaniyalı müdafiəçisi İvan Alexandro Benites bu kluba gəlişi barədə danışıb, yerli çempionatın səviyyəsini dəyərləndirib, AZAL ilə keçiriləcək oyun haqqında fikirlərini bölüşüb, digər suallara cavab verib. Azerisport.az sizi həmin müsahibə ilə tanış edir.
- “İnter”ə keçidiniz necə alındı?
- Ötən mövsümün başa çatmasından sonra şəraiti dəyişmək istədim. Sonra “İnter”dən təklim aldım və həvəslə qəbul etdim. Etiraf edim ki, “İnter” karyeramda yeni mərhələdi və komandanın uğuru üçün bütün gücümü sərf etməyə çalışacağam.
- “İnter”ə gəlməmişdən öncə Azərbaycan futbolu haqqında hansı məlumatlara malik idiniz?
- Səmimi desəm, bu ölkəyə gəlməmişdən əvvəl Azərbaycan çempionatı barədə məlumata malik deyildim. Ancaq Kipr çempionatında oynamış və hazırda “Bakı”nın ispaniyalı futbolçusu Mario Martines Rubio bu məsələdə mənə çox kömək etdi. O dedi ki, burada bir çox güclü komandalar var və yerli çempionat kifayət qədər yaxşı səviyyədədi.
- Azərbaycanda yeni mövsüm bir neçə həftə öncə başlayıb. Ötən müddət ərzində çempionat sizdə hansı təəssüratları oyatdı?
- Biz iki güclü komandayla iki qarşılaşma keçirdik. Təəssüflər olsun ki, bu matçlarda yaxşı nəticə əldə edə bilmədik. Bütün komandalar yalnız uğura köklənib, çempionat böyük rəqabətliyə malikdi. Bizə bu mövsüm asan olmayacaq, ancaq var gücümüzlə məşq edəcəyik və düşünürəm ki, bizim səylərimiz bəhrəsini verəcək.
- Yəqin qohumlarınız və dostlarınız sizdən Azərbaycan haqqında soruşurlar. Maraqlıdı, bizim ölkəni necə təsvir etdiniz?
- Dedim ki, burada hər şey xoşuma gəlir. Etiraf edirəm, mənə elə gəlir ki, burada artıq çoxdandı yaşayıram. Bakı çox gözəl şəhərdi, bura çox maraqlıdı. Ailəm və dostlarım mənə görə çox şaddırlar.
- Qarşıda komandanı AZAL ilə oyun gözləyir. Bu matç haqqqında nə deyə bilərsiz? Rəqib haqqında hansı məlumatlara maliksiniz?
- Bu günlərdə komandayla birlikdə rəqibimizin qalib gəldiyi AZAL – “Bakı” matçını seyr etdik. Etiraf edim ki, AZAL məndə yaxşı təəssürat oyatdı. Düşünürəm ki, onlar bizə çətinliklər yaratmaq istəyəcəklər. Lakin biz buna hazır olmalıyıq. “İnter” hər matçda meydana qalib gəlmək məqsədilə çıxır. Bu oyunu udmağa və ilk üç xalı qazanmağa çalışmalıyıq. (klub saytı)
