20 avqust 2013 11:26
İnter daha bir hücumçu ilə güclənir
Avropa Liqasındakı uğursuzluğun ardından Topaz Premyer Liqasının yeni mövsümündə də işləri yaxşı getməyən “İnter” transfer pəncərəsi bağlanana qədər heyətini iki futbolçu ilə gücləndirməyə qərar verib. Azerisport.az xəbər verir ki, artıq “bankirlər”in almaq istədiyi bir futbolçunun kimliyi bəllidi.
Bu, makedoniyalı hücumçu İlço Naumovskidi. O, artıq ölkəmizə gəlib. 30 yaşlı futbolçu yaxın günlərdə tibbi müayinədən keçəcək və onunla rəsmi müqavilə bağlanacaq. Klubdan aldığımız məlumata görə, tərəflər bir illik müqavilə ilə bağlı razılığa gəliblər.
Qeyd edək ki, Naumoskinin son iş yeri Avstriyanın “Mattersburg” klubu olub. 2005-ci ildən bu komandada çıxış edən forvard 197 oyunda 46 qol vurub. O, əvvəllər Avstriyanın “Grazer AK”, Türkiyənin “Malatyaspor” və İtaliyanın “Cataniya” klublarında çıxış edib. Amma İlçonun İtaliya karyerası uğursuz alınıb. Belə ki, o, “Cataniya”nın əsas heyətində debüt edə bilməyib.
Naumoski Makedoniya milli komandasının üzvüdü. 2003-cü ildən komandaya çağırılan futbolçu 45 oyunda 9 qola imza atıb.
“İnter” Naumovski ilə yanaşı daha bir futbolçu ilə danışıqlar aparır. Amma həmin futbolçunun adı hələlik açıqlanmır.
