20 avqust 2013 17:52
Lippert: Qarabağın uğur qazanmaq şansı azdı
Futbol üzrə Azərbaycanın U-21 yığmasının baş məşqçisi, AFFA-nın texniki direktoru Bernard Lippert Almaniya mətbuatına müsahibə verib. Azerisport.az xəbər verir ki, almaniyalı mütəxəssis Avropa Liqasında bu ölkənin “Eintracht” və Azərbaycanın “Qarabağ” klubları arasında keçiriləcək oyunlardan danışıb.
“Böyük ehtimalla, “Qarabağ” bu oyunların autsayderidi. Amma Ağdam klubu hazırda çox yaxşı vəziyyətdədi. Onlar üç təsnifat mərhələsini demək olar ki, problemsiz adlaya bildilər. Bu yolda Polşa, İsveç klublarına qalib gəliblər”.
Lippertin sözlərinə görə, “Qarabağ” “Eintracht” üçün zəif rəqib təsiri bağışlasa da, almanlar buna görə arxayınlaşmamalıdılar: “Çox diqqətli oynamaq lazımdı. Heç kim gözlənilməzliklərdən sığortalanmayıb”.
Almaniyalı mütəxəssis bu iki klubun çıxış etdiyi ölkə çempionatlarını da müqayisə edib: “Qarabağ” “Eintracht” kimi hər həftə yüksək səviyyəli klublara qarşı oynamaq şansı əldə etmir. Komandanın heyətində səviyyəli legionerlər var. Onlar xüsusilə fərdi keyfiyyətlərinə görə çox güclüdülər. Müxtəlif yığmalarda çıxış edən çoxlu oyunçulara malikdilər. Təxminən 7-8 legioner futbolçusu var”.
Lippert Qurban Qurbanovun yetirmələrinin şansının az olduğunu düşünür: “Fikrimcə, “Qarabağ” ev oyununda qolsuz heç-heçə etməyə çalışacaq, mümkündü ki, qol da vuracaq. Amma bu komandanın uğur qazanmaq şansının az olduğunu düşünürəm. “Qarabağ” çox yaxşı komandadı. Əla futbol sərgiləyirlər. Lakin Almaniya klubu daha şanslı görünür”.
