21 avqust 2013 13:06
Xəzər Lənkəran Böyük oyuna hazırlığa start verdi
Dünən Lənkərandakı bazasında toplaşan “Xəzər Lənkəran” axşam məşqi ilə “Böyük oyun”un hazırlığına start verib. Azerisport.az xəbər verir ki, Topaz Premyer Liqasının 4-cü turunda “Neftçi”ni qonaq edəcək komanda bu oyuna dönüş matçı kimi baxır.
Təsadüfi deyil ki, axşam məşqində Con Toşak yetirmələrini məşq ortasında iki dəfə fiziki çalışmalarla yorub, “Bazar gününə çox var və hamınız bu oyuna hazır olmalısız!” deyərək motivasiya etməyə çalışıb.
Bu gün “Xəzər Lənkəran” gün ərzində daha iki məşqə çıxacaq. Səhər məşqini artıq yekunlaşdıran komandada qapı xətti istisna olmaqla zədəli futbolçuların olmaması məşqçilər korpusunu sevindirən məqamdı. Təkcə Duqlas Leyte və Orxan Sadıqlının zədələri davam edir və komandanın tibb korpusu hər iki futbolçunun bərpası üçün səylərini davam etdirir.
