21 avqust 2013 14:30
“Qarabağı keçsək, 5 milyon avro gəlir əldə edəcəyik”
UEFA Avropa Liqasının pley-off mərhələsində “Qarabağ”ın rəqibi olan Almaniyanın “Eintracht” klubu artıq bu turnirin qrup mərhələsinə vəsiqə qazanacağı halda əldə edəcəyi qazancı hesablamağa başlayıb. Azerisport.az xəbər verir ki, Frankfurt klubunun maliyyə məsələləri üzrə direktoru Axel Helmann avqustun 22-də Bakıda baş tutacaq ilk oyun öncəsi yerli mətbuata maraqlı açıqlama verib.
O qeyd edib ki, komandasının hədəfi “Qarabağ”ı mübarizədən kənarlaşdıraraq Avroliqanın qrup mərhələsinə düşməkdi: “Bu, həm klub, həm futbolçular, həm də azarkeşlər üçün böyük bayram olar. Əgər “Qarabağ”ı keçib, qrupda oynamaq şansı əldə etsək, o zaman ən azı beş milyon avro qazanacağıq. Belə gəlirlər bizim klubun büdcəsində önəmli rol oynayır. Çünki bu, gələcəkdə digər problemlərimizi yoluna qoymağa şərait yaradacaq”.
Maraq üçün qeyd edək ki, “Qarabağ”la “Eintracht” arasındakı ilk oyun sabah Bakıda, cavab görüşü isə bir həftə sonra Frankfurtda keçiriləcək.
