27 avqust 2013 13:24
Qarabağ Frankfurt səfəri ilə bağlı ciddi problemlə üzləşdi
“Qarabağ” bu gün Avropa Liqasının pley-off mərhələsi çərçivəsində Almaniya “Eintracht”ı ilə cavab matçına yollanmalıydı. Lakin azerisport.az xəbər verir ki, Ağdam klubu ciddi problemlə üzləşib.
Belə ki, komandamız Frankfurta nə vaxt yola düşəcəyini hələ də dəqiqləşdirə bilmir. Buna səbəb isə Frankfurt aeroportunun komandamızı aparacaq çarter reysini qəbul etmək üçün konkret bir vaxt müəyyənləşdirə bilməməsi, müsbət cavab verməməsidi. Almanların bu uçuşa hələ də rəsmi cavab verməməsi isə komandamızı çətin vəziyyətdə qoyub və Ağdam klubunun cavab matçı öncəsi planları alt-üst olmaqdadı. Məsələ burasındadı ki, “Qarabağ”ın kollektivinin nəinki bu gün, heç sabah da Frankfurta yollanması baş tutmaya bilər. İstisna deyil ki, Azərbaycan təmsilçisi Almaniyaya elə oyun günü yollansın.
Qeyd edək ki, “Qarabağ”ın “Eintracht”la cavab matçı avqustun 29-da keçiriləcək. Bu komandalar arasındakı ilk oyunda ağdamlılar 2 cavabsız qolla məğlub olmuşdular.
