28 avqust 2013 21:14
Neftçi də bəyanat yaydı
“Xəzər Lənkəran”ın ardınca “Neftçi” də bəyanat yayıb. Azerisport.az sizi həmin bəyanatla olduğu kimi, tanış edir:
“Azərbaycan Respublikasının Prezidenti cənab İlham Əliyevin imzaladığı “Azərbaycan Respublikasında 2005-2015-ci illərdə futbolun inkişafına dair Dövlət Proqramı” ölkə başçısının futbola diqqət və qayğısının əsas göstəricisidi. Rövnəq Abdullayevin rəhbərliyi ilə Azərbaycan Futbol Federasiyaları Assosiasiyası Dövlət Proqramının müddəalarını uğurla həyata keçirir. Artıq bir neçə iri miqyaslı futbol və infrastruktur layihələrinin yüksək səviyyədə təşkili buna bariz nümunədir. Dünya idmanı tarixində ilk dəfə təşkil olunacaq Avropa Olimpiya Oyunları üçün nəzərdə tutulan Olimpiya stadionu Azərbaycan futbolu üçün də böyük töhvə olacaq. Təsadüfi deyil ki, Bakı 2020-ci il Avropa Çempionatına ev sahibliyinə namizədliyini irəli sürüb. Rövnəq Abdullayevin AFFA Prezidenti seçilməsindən sonra Peşəkar Futbol Liqasının yaradılması ilə Azərbaycan çempionatının səviyyəsi yüksəlmişdir və bu inkişaf ilbəil artır. Artıq Azərbaycan futbolu klub miqyaslı yarışlarda da uğurlar əldə etməyə başlayıb. “Neftçi”nin Avropa Liqası turnirinin qrup mərhələsinə vəsiqə qazanması, “Qarabağ” klubunun dəfələrlə play-off mərhələsində çıxış etməsi AFFA-nın Azərbaycanda futbolun inkişafı naminə gördüyü məqsədyönlü işin göstəricisidir. Əminliklə demək olar ki, AFFA Prezidenti Rövnəq Abdullayevin seçdiyi inkişaf strategiyası düzgündür və yaxın gələcəkdə ölkə futbolu daha böyük zirvələri fəth edəcək. “Neftçi” olaraq bu strategiyanı daim dəstəkləmişik və futbolumuzun inkişafı naminə çalışırıq. Əldə etdiyimiz nəticələr, avrokuboklardakı uğurlarımız düzgün yolda olduğumuzu sübut edir.
Təəssüf ki, Topaz Premyer Liqasının IV turu çərçivəsində keçirilmiş “Xəzər-Lənkəran” - “Neftçi” oyununda baş verən olaylar olduğu kimi qələmə verilmədi. Nəticədə bu azarkeşlər arasında vəziyyətin gərginləşməsinə gətirib çıxardı. Baş verən olaylarla bağlı AFFA-nın İntizam Komitəsi haqlı qərarlar qəbul etdi. Ümid edirik ki, bu qərarlar belə halların gələcəkdə bir daha yaşanmamasına zəmin yaradacaq. Sözsüz ki, futbol azarkeşlər üçün oynanılır, amma onlar da idman prinsiplərini unutmamalıdırlar. “Neftçi” bütün klublarımızla dost münasibətlərə malikdir. Biz yalnız meydanda 90 dəqiqə ərzində rəqibik. “Neftçi”, eləcə də bütün klublar bir amala - Azərbaycan futbolunun inkişafına xidmət edir”.
