28 avqust 2013 11:32
Con Toşak: Hiss edirəm ki, məni istəməyən azarkeşlər var
"Topaz" Premyer Liqasının 4-cü turu başa çatdıqdan sonra bir günlük istirahətə buraxılan “Xəzər Lənkəran” dünən axşamdan başlayaraq məşqlərini bərpa edib. Azerisport.az xəbər verir ki, ehtiyat meydançada baş tutan hazırlıqda “Xəzər Lənkəran”lı futbolçular əsasən fiziki çalşmaları yerinə yetiriblər.
Yüngül zədəsi olan Mbilla Etame isə fərdi qaçışla kifayətlənib. Dünən baş tutan məşqdən sonra “Xəzər Lənkəran”ın baş məşqçisi Con Toşak klubun rəsmi saytına ayaqüstü fikirlərini bildirib:
“Neftçi” ilə oyunda komandamızın oyununu bəyəndim. Bu qədər qol vəziyyətindən yararlana bilməməyimiz çox böyük bəxtsizlikdi. Lakin biz bir futbolçunun üzərinə düşüb “niyə bu qədər vəziyyəti qola çevirə bilmədin?” deyə irad bildirsək, düzgün olmaz. Qolu vurmaq üçün bəzən müdafiəçilərimiz də irəli gedir. Deməli bütün komanda qol vurmağa borclu idi. Hiss edirəm məni istəməyən azarkeşlər də var. Onlar irad bildirir, nəticə istəyirlər. Mən tam səmimiyyətimlə azarkeşləri haqlı sayıram. Çünki, onlar pul verib matçı izləməyə gəlir və nəticə istəyirlər. Ona görə də azarkeşi qınamağa haqqım yoxdu. Bununla belə komandamızın getdikcə daha yaxşı oyun göstərməsi bizim düzgün yolda olduğumuzu göstərir. İnanıram ki, “Xəzər Lənkəran” tezliklə uğursuzluq zolagından, bəxtsizlikdən qurtulub inamla yoluna davam edəcək!”
