29 avqust 2013 18:31
Maksim Medvedev: Əgər erkən qol vursaq...
“Qarabağ”ın müdafiəçisi Maksim Medvedev Avropa Liqasının pley-off mərhələsi çərçivəsində Almaniyanın “Eintracht” klubuna qarşı cavab oyunu öncəsi fikirlərini açıqlayıb. Azerisport.az saytına müsahibəsində o, bunları dilə gətirib:
“Biz ilk oyunda daha yaxşı oynaya bilərdik. 2 cavabsız qolla uduzmağımızda özümüz günahkarıq. İndi daha yaxşı oynamağımız və həmin səhvləri təkrarlamamağımız vacibdi. Artıq rəqibin nəyə qadir olduğunu bilirik. Onlar hətta ən kiçik səhvləri də bağışlamırlar. Bakıda ötürmələrdə çox səhvlər etdik. Mövqe baxımından da səhvlərimiz var idi, bir-birimizə istənilən səviyyədə kömək edə bilmədik. Texniki səhvlər psixoloji baxımdan da bizə təsirsiz ötüşmədi. Artıq növbəti dəfə topu itirmək qorxusu yaranmağa başladı. Düzdü, ikinci hissədə toplarlındıq, çalışdıq ki, öz oyunumuzu sərgiləyək. Lakin 4-5 qol epizodu yaratsaq da, onlardan istifadə edə bilmədik. Amma onların fasilədən sonra cəmi bir qol epizodu oldu, ondan da yararlandılar”.
Medvedev Frankfurtdakı oyunun Bakıdakından fərqlənəcəyini deyir: “Almaniyada daha sakit oynayacağıq. Çünki itiriləsi heç nəyimiz qalmayıb. Öz futbolumuz u göstərməyə çalışacağıq. Bakıdakından daha asan olmalıdı. “Eintracht”la oynamaq olar. Sadəcə, bunun üçün sakitliyimizi qorumalıyıq”.
Maksim zədəli Srcan Lakiçin oynamamasını komandası üçün önəmli üstünlük hesab etmir: “Lakiç yaxşı futbolçudu. Sona qədər mübarizə aparır, ikinci hissədə yaxşı oynayır. Bizə müdafiədən çıxmağa çox mane olurdu. Belə futbolçulara qarşı oynamaq çox çətindi. Amma “Eintracht”da onu əvəzləyəcək futbolçular var. Odu ki, buna görə arxayınlaşmağa heç bir əsasımız yoxdu”.
“Qarabağ”ın müdafiəçisi komandasının “Eintracht” səddini keçəcəyinə inamını itirməyib: “Aydın məsələdi ki, bizim çox az şansımız var. Amma yenə də öz futbolumuzu oynamağa çalışmalıyıq. Əgər erkən qol vursaq, bu, bizim üçün çox yaxşı stimul olacaq. Lakin Bakıdakı kimi erkən qol buraxacağımız halda da ruhdan düşməməliyik. Frankfurtda vəziyyəti xeyrimizə dəyişə bilərik”.
