30 avqust 2013 01:25
UEFA Beşiktaşı da ofsayda saldı?
UEFA “Fenerbahçe” klubunun ardından Türkiyənin daha bir təmsilçisini avrokuboklardan kənarlaşdıra bilər. Azerisport.az xəbər verir ki, Avropa Liqasının pley-off mərhələsində mübarizə aparan “Beşiktaş” üzücü xəbərlə sarsılıb.
Belə ki, Türkiyə mətbuatı bu gecə UEFA-dan İstanbul klubuna faks daxil olduğu barədə xəbərlər yayıb. Faksda “qara qartallar”ın bu gün keçiriləcək Avropa Liqasının püşkatma mərasiminə gəlməməsi vurğulanıb. Lakin hələlik UEFA və “Beşiktaş” bu barədə rəsmi məlumat yaymayıb və xəbərin nə dərəcədə doğru olduğu bəlli deyil.
Qeyd edək ki, “Beşiktaş”ın da adı danışılmış oyunlarda hallandığından UEFA bu komandanı bir illiyinə avrokuboklardan kənarlaşdırmışdı. Lakin Beynəlxalq İdman Arbitraj Məhkəməsi UEFA-nın həmin qərarını dondurmuşdu. Bu üzdən də “qara qartallar” müvəqqəti olaraq Avroliqanın təsnifat mərhələsində çıxış edirdilər. İstanbul klubu pley-off mərhələsində səfərdə Norveç “Tromse”sinə 1:2 hesabıyla uduzsa da, bu gecə doğma meydanında 2 cavabsız qolla qalib gələrək adını qrup mərhələsinin iştirakçıları sırasına yazdırdı. Amma böyük ehtimalla UEFA bu komandanın qrupda iştirakına imkan verməyəcək. “Beşiktaş”ı bu turnirdə hansı komandanın əvəz edəcəyi də hələlik məlum deyil. Mümkündü ki, qitə futbol qurumu “Tromse”nin qrupda oynamasına şərait yaratsın. Əks halda “Fenerbahçe”ni əvəzələyəcək komanda kimi, “Beşiktaş”ın da əvəzində oynayacaq komanda pley-off mərhələsinin məğlubları arasında atılacaq püşklə müəyyənləşəcək.
