31 avqust 2013 15:45
Topaz Premyer Liqası, 5-ci tur: Mahmud Qurbanovun proqnozu
“Kəpəz”in sabiq baş məşqçisi Mahmud Qurbanov Topaz Premyer Liqasının 5-ci turunun oyunları ilə bağlı proqnozlarını açıqlayıb. Azerisport.az sizi həmin proqnozlarla tanış edir.
Bakı – Neftçi
Bu oyun turun mərkəzi görüşü olacaq. İki prinsipial komanda üz-üzə gələcək. Əminəm ki, “Neftçi” Lənkərandakı xal itkisindən sonra mütləq qələbə qazanmaq istəyir. “Bakı” isə yenicə forma yığmağa başlayıb. Komandaya üç xal çox lazımdı. Amma mənə elə gəlir ki, bu komandalar heç-heçə edəcəklər.
Qəbələ - Xəzər Lənkəran
Qəbələ - Xəzər Lənkəran
“Qəbələ” mövsümə yaxşı başlamışdı. Amma son iki oyunda komandada sanki bir arxayınlıq yarandı. “Xəzər Lənkəran” isə hələlik qələbəsiz irəliləyir. Son turda da çoxlu güc sərf edib. Bu üzdən “Qəbələ”ni də səfərdə məğlub etmək çətin olacaq. Bu oyundan da heç-heçə gözləyirəm.
İnter – Simurq
Hər iki komanda qələbəyə oynayacaq. “Rəvan”la oyunun nəticəsi “bankirlər”in durumunu az da olsa, yaxşılaşdırdı. İndi onlardan daha inamlı oyun gözləmək olar. “İnter” qalib gələcək.
Sumqayıt – Rəvan
Hər iki komandanın oyununu görmüşəm. “Sumqayıt”ın çıxışı daha çox xoşuma gəlib. Onlar daha baxımlı futbol sərgiləyirlər. “Rəvan”ın isə problemləri var. “Sumqayıt”ın qalib gələcəyini düşünürəm
Qarabağ – AZAL
Ağdamlıların psixoloji baxımdan müəyyən problemləri ola bilər. Onlar Avropa Liqasını tərk ediblər və indi çempionata köklənmək lazımdı. Yorğunluq da var. AZAL isə son turlarda inamlı çıxış edir. Bu üzdən də “təyyarəçilər”in ən azı heç-heçəyə nail olacağını düşünürəm.
