2 sentyabr 2013 16:30
Rəvan Sumqayıtla matçda yaranan mübahisəli epizodun videosunu yaydı (VİDEO)
“Rəvan” Topaz Premyer Liqasının 5-ci turunun “Sumqayıt”la oyununda (1:0) Ramazan Abbasovun qırmızı vərəqə almasından narazıdı. Azerisport.az xəbər verir ki, ikinci sarı vərəqə ilə meydandan qovulan bu futbolçunun cərimə meydançasında simulyasiya etdiyinə görə xəbərdarlıq alması paytaxt təmsilçisini narazı salıb.
Bununla bağlı video da yayımlayan “aslanlar” iddia edirlər ki, Abbasov bu epizodda heç bir simulyasiya etməyib. Əksinə, rəqib qapıçı Ramazana qarşı kobud oynayıb və baş hakim Fariz Yusifov meydan sahiblərinin qapısına penalti təyin etməliydi. Lakin göründüyü kimi, Yusifov fərqli qərar çıxarıb.
Maraq üçün bildirək ki, Yusifov bu oyunda məhz elə Ramazana görə çox kobud səhvə də yol verib. Belə ki, matçın sonlarında Abbasova ikinci sarı vərəqə göstərən referi onu qırmızı vərəqəylə meydandan qovmağı unudub. Üstündən təxminən beş dəqiqə keçəndən sonra dördüncü hakimin köməyi sayəsində Fariz Yusifov bu səhvini aradan qaldırıb.
