5 sentyabr 2013 18:11
“Mübarizəsiz təslim olmaq niyyətimiz yoxdu”
Topaz Premyer Liqasına uğursuz start verən "Rəvan” 5-ci turda "Sumqayıt” üzərində qələbə qazanmaqla "qara zolaq”dan çıxdı. Azerisport.az xəbər verir ki, ilk qələbənin əldə olunmasında əsas pay sahiblərindən biri də yeganə qolun müəllifi Kamil Nurəhmədov oldu.
Klub tarixinə "Rəvan” forması ilə Premyer Liqada fərqlənən 23-cü futbolçu kimi düşən "11” nömrə axşam məşqindən öncə klubun rəsmi saytına danışıb.
Nurəhmədov sözlərinə belə başlayıb: "Bu qələbəyə böyük ehtiyacımız var idi. Çünki ardıcıl uğursuzluqlar futbolçuların psixoloji durumuna da mənfi təsir göstərirdi. Bu uğursuz gedişə "dur” deməyin vaxtı çatmışdı. Şükürlər olsun ki, Sumqayıtda ilk qələbimizi bayram etdik. Qolu kimin vurmağı önəmli deyil, əsas olan qələbə idi ki, buna da nail olduq”.
Kamil "Rəvan” forması ilə vurduğu ilk qolu isə belə təsvir edib: "Əks-hücuma çıxarkən qarşımda boş sahənin olduğunu gördüm və irəli şığıdım. Fərdi bacarığı ilə rəqiblərdən sıyrılan Sebastyandan ötürmə aldıqdan sonra fikrim yalnız dəqiq zərbə vurmağa yönəlmişdi. Qapıçı irəli çıxdığından bir hərəkətlə onu çaşdırdım və yerə uzanmasına nail oldum. Ardından topun altından vuraraq onu tora göndərdim”.
Komandanın yayda heyətinə qatdığı futbolçu ilk qolunun ona mənəvi dəstək olacağını düşünür: "Rəvan”da ilk qolumu vurdum. Ümid edirəm ki, bu tempdə də davam edəcəm. Çoxdan oynamadığımdan hələ oyun təcrübəsi baxımından bəzi problemlər yaşayıram. Bunu yoluna qoyduqdan sonra daha yaxşı çıxış edəcəm. Məşqçilərin etimadını qazanacağıma inanıram. Məşqlərdə var qüvvəmlə çalışıb optimal formaya düşmək niyyətindəyəm”.
22 yaşlı futbolçu sonda "Qarabağ” ilə növbəti tur oyununa toxunub: "Rəqibin gücü bəllidir. Bizi çox çətin oyun gözləyir. Amma mübarizəsiz təslim olmaq niyyətimiz də yoxdur. Sona qədər döyüşəcəyik. AZAL göstərdi ki, bu komandaya qarşı oynamaq olar. Biz də əlimizdən gələnin ən yaxşısını edib "Sumqayıt”la matçdakı qələbənin təsadüf olmadığını göstərməyə çalışacağıq”.
