5 sentyabr 2013 16:16
Milli komandamıza dəvət alan futbolçu: Arzum Qazaxıstan yığmasında oynamaqdı
Xəbər verdiyimiz kimi, sentyabrın 5-dən 11-ə qədər Rusiyanın Novorossiysk şəhərində 19 yaşadək futbolçulardan ibarət Azərbaycan yığmasının təlim-məşq toplanışı keçiriləcək. Azerisport.az xəbər verir ki, Rusiyaya gedəcək futbolçuların siyahısında ötən gün bir dəyişiklik edilmişdi.
Belə ki, Bilal Abbaszadə ("Qarabağ") zədəli olduğu üçün heyətdən çıxarılmış, əvəzində, Qazaxıstanın "Şaxtyor" (Karakanda) klubunun oyunçusu Zair Emzayev yığmamıza dəvət olunmuşdu. O, bu gün Qazaxıstan mətbuatına müsahibəsində maraqlı açıqlamalar verib:
“Bəli, Azərbaycanın U-19 yığmasından təklif almışam. Mən razı idim. Amma valideynlərimin, məşqçilərimin, “Şaxtyor” rəhbərliyinin də fikri mənim üçün önəmli idi. Onlar da buna qarşı çıxmadılar. Ona görə də sabah Azərbaycan komandasının məşqlərinə qoşulmaq üçün sabah Krasnodara uçacağam. Məni Azərbaycanla bağlayan yeganə amil milliyətimlə bağlıdı. Lakin dəfələrlə demişəm ki, mənim arzum Qazaxıstan yığmasında oynamaqdı. Mən hücumçuyam. Amma son turlarda insayd kimi çıxış edirəm. Qazaxıstanın U-19 yığmasına dəvət alacağımı çox gözləsəm də, bu, heç vaxt baş verməyib. Deyilənə görə noyabrda çağıracaqlar. Zaman göstərəcək. Azərbaycanlılar mənim oyunlarımı izləyiblər və çıxışımı bəyənirlər. Azərbaycan mənim tarixi vətənimdi, orda mənim millətim yaşayır. Amma Qazaxıstanda boya-başa çatmışam. Bu, mənim doğma vətənimdi. Azərbaycan çox sağ olsun ki, mənə etimad göstərdi, dəvət göndərdi. Məşqlərdə əlimdən gələni edəcəyəm ki, bu etimadı doğruldum”.
