8 sentyabr 2013 01:06
Millimizin İsraillə matçında bayraq qalmaqalı (FOTO)
DÇ-2014-ün seçmə mərhələsi çərçivəsində bu gecə keçirilmiş İsrail – Azərbaycan matçı qalmaqalla yadda qalıb. Azerisport.az xəbər verir ki, Ramat Qandakı qarşılaşma zamanı israilli fanatlar stadionda Dağlıq Qarabağdakı erməni icmasının saxta bayrağını qaldırıblar.
Qeyd edək ki, bu, son dövrlərdə azərbaycanlı futbolçuların üzləşdiyi ikinci belə təxribatdı. Belə ki, bir müddət öncə Avropa Liqasının ikinci təsnifat mərhələsi çərçivəsində keçirilmiş “Qarabağ”ın Polşa “Piast”ı ilə səfər matçında polşalı fanatlar da oxşar təxribata əl atmışdılar. Lakin o zaman “Qarabağ” rəsmilərinin dərhal məsələyə müdaxiləsi həmin saxta bayrağın tribunadan yığışdırılması ilə nəticələnmişdi. Ağdam klubu həmçinin UEFA-ya da şikayət ünvanlamışdı və nəticədə bu günlərdə qitə futbol qurumu “Piast”a ağır cəza kəsdi. Belə ki, UEFA İntizam Komitəsi Qlivitse komandasını 5 min avro cərimələdi. İntizam Komitəsi cərimə ilə yanaşı, kluba məxsus stadionda “Ultras” fanat qrupunun yer aldığı hissəni də bağlayıb.
Güman ki, AFFA rəhbərliyi də bu məsələ ilə bağlı UEFA-ya rəsmi şəkildə şikayət edəcək və Ramat Qandakı stadion, eləcə də İsrail Futbol Federasiyası sözügedən təxribata görə cəzalanacaq.
Bu təxribatlara isə ən gözəl cavabı futbolçularımızın verdiyini demək olar. Belə ki, “Qarabağ” evdə 2:1 hesabıyla yendiyi “Piast”la səfərdə 2:2 hesablı heç-heçə etməklə mərhələ adlamışdı. Yığmamız isə Bakıda olduğu kimi, İsraillə səfərdə də 1:1 hesablı heç-heçəyə nail olaraq, bu komandanın DÇ-2014-ə yollanmaq arzularının üstündən xətt çəkdi.
