10 sentyabr 2013 00:06
Con Toşak: Sanki Xəzər Lənkəranı ovsunlayıblar
Premyer Liqanın 6-cı turu çərçivəsində sentyabrın 14-də “Fırtınalar meydanı”nda “Bakı”nı qəbul edəcək “Xəzər Lənkəran” doğma şəhərə qayıdıb. Azerisport.az xəbər verir ki, komanda ötən gün saat 18:00-da stadionun yardımçı meydançasında məşqə çıxıb.
İsinmə hərəkətlərini Emin Quliyevin rəhbərliyində edən futbolçular daha sonra baş məşqçi Con Toşakın rəhbərliyi altında ikitərəfli oyun keçirib. İkitərəfli oyunda Toşak müdafiəçilərin daim arxada qalmasını və hücumlara qoşulmamasını istəyib. Fiiki hazırlıq üzrə yeni məşqçi Covanni Melkiore kənarda duraraq bütün bunları seyr edib.
İkitərəfli oyun zamanı qəribə bir hadisə yaşanıb. Belə ki, 40 dəqiqə ərzində qapılara qol getməyib. Bəzən hətta boş qapılara göndərilən toplar da qapı dirəklərinə tuş gəlib və ya ağlasığmaz trayektoriya ilə qapıdan aralı keçib. Bunu görüncə təəssüflə dolu heyrətini gizlədə bilməyərək başını tutub kənara çəkilən Con Toşak üzünü köməkçisi Covanni Melkioreyə tərəf çevirərək belə deyib: “Bax mən bunu deyirdim. Sanki komandanı ovsunlayıblar. Bizim yeganə problemimiz qol vura bilməməyimizdi”.
İki tərəfli oyun bitdikdən sonra futbolçular Melkiorenin sərəncamına keçiblər. Fiziki hazırlıq üzrə mütəxəssis 3 günlük istirahətin ardından ağır məşqdə yorulan komanda üzvləri ilə xüsusi fiziki hərəkətləri tətbiq edərək bərpa məşqini keçib. (12-ci oyunçu)
