9 sentyabr 2013 15:31
Millimizin hücumçusu yaşıl meydanlara qayıdır
Topaz Premyer Liqasının növbəti turunda səfər meydanında "Simurq"la qarşılaşacaq "Sumqayıt" Futbol Klubu hazırlığını davam etdirir. Azerisport.az xəbər verir ki, uzun fasilədən sonra komanda ilə məşqlərə başlayan Pərdis Fərcad-Azad zədəsini tam sağaldıb.
Bu barədə futbolçunun özü klubun rəsmi saytına açıqlama verib: "Futbol üçün çox darıxmışam. Artıq zədəm tam sağalıb. Var qüvvəmlə məşqlərdə hazırlaşıram. Son turda "Rəvan"la görüşdə təxminən 20 dəqiqə meydanda oldum . Düzdür, hələ tam hazır sayıla bilmərəm. Amma yaxın günlərdə əvvəlki formamı bərpa edib qollarımı vurmağa davam edəcəm. Məşqçilər korpusu məsləhət bilsə "Simurq"la görüşdə meydana çıxa bilərəcəm".
Qeyd edək ki, Pərdis 2012/2013 mövsümündə "Sumqayıt"ın heyətində Topaz Premyer Liqasında 23 oyunda meydana çıxıb (1768 dəqiqə) və 9 qol vurub.
