12 sentyabr 2013 16:59
Qəbələ ciddi itki ilə üzləşdi
Həftənin bazar günü - 15 sentyabrda Premyer Liqanın VI turu çərçivəsində AZAL-la qarşılaşacaq "Qəbələ" böyük itki ilə üzləşib. Azerisport.az xəbər verir ki, komandanın aparıcı üzvlərindən Rail Məlikov məşq zamanı ağır zədə alıb.
Futbolçunun 4 və ya 5 ay yaşıl meydanlardan kənar qalması gözlənilir. Bu barədə klub saytına açıqlamasında əsas heyətin həkimi Rahim Məhərrəmov məlumat verib.
Məhərrəmovun sözlərinə görə, müdafiəçinin ön çarpaz bağları qopub: "Zədənin ardından Rail dərhal müayinə olundu. Müayinə zamanı məlum oldu ki, müdafiəçimizin ön çarpaz bağları qopub. Bu idmanda çox ağır zədələrdən hesab olunur. Futbolçu sabah əməliyyat üçün Türkiyəyə yollanacaq. O, "Acıbadem" xəstəxanasında əməliyyat olunacaq. Bundan sonra futbolçu 4 və ya 5 ay bərpa prosesi keçməlidir".
