Qurban Qurbanov: Rəvanla heç-heçəni sürpriz saymaq olmaz

“Qarabağ”ın baş məşqçisi Qurban Qurbanov Topaz Premyer Liqasının 6-cı turunun “Rəvan”la oyununu şərh edib. Azerisport.az xəbər verir ki, Ağdam təmsilçisinin çalışdırıcısı 1:1 hesabıyla başa çatan görüşdən sonra bunları dilə gətirib:

 

“Vladislav Qədirovu “Rəvan”a baş məşqçi təyin olunması ilə təbrik edirəm. Ötən turdakı qələbə və bugünkü heç-heçə göstərir ki, komanda onun göstərişlərini uğurla yerinə yetirir. Bizdə çempionat elədi ki, istənilən komanda digərindən xal ala bilər. Ona görə də bu nəticəni sürpriz saymaq olmaz. Baxmayaraq ki, buraxdığımız qol bir qədər gözlənilməz alındı. Heç mən özüm də qol buraxdığımıza inanmırdım. Bu gün bəzi yığma üzvlərinə istirahət verdim. Onlar bir qədər yorğun idilər. Ümumiyyətlə, heyətlə bağlı problem olanda istədiyimiz oyunu göstərə bilmirik. Bəlkə də son 3 ayın psixoloji yorğunluğu özünü biruzə verir. Futbolçulara iradım yoxdu. Qələbə üçün oynayırdılar. Alınmadı, hər şey ola bilər. Komandaya iki günlük istirahət veriləcək, Admir Teli, Nikolas Gelaşvili və Ulrix Kapolonqo milli komandaların düşərgələrindən təzə qayıdıblar”.