16 sentyabr 2013 00:26
Futbolçularımız baş məşqçisiz qaldılar
Türkiyənin “Kahramanmaraşspor” klubu baş məşqçisiz qalıb. Azerisport.az xəbər verir ki, PTT Birinci Liqada çıxış edən sözügedən komandanın çalışdırıcısı Besim Durmuş ötən gün istefa verib.
O, 4-cü turun “Adanaspor”la oyunundan sonra istefa verib. 2:3 hesablı yenilgidən sonrakı bu qərar rəhbərlik tərəfindən də qəbul olunub.
Qeyd edək ki, “Kahramanmaraşspor” geridə qalan dörd turda 3 oyunu məğlub başa vurub. Yalnız bir oyunda heç-heçə edən bu komanda topladığı 1 xalla 19 klub arasında sonuncu pillədə qərarlaşıb.
Maraq üçün bildirək ki, “Kahramanmaraşspor”da futbol üzrə Azərbaycan yığmasının sabiq hücumçusu Fərid Quliyevlə Murad Axundzadə də çıxış edir. Onları bu komandaya məhz Besim Durmuş aparsa da, Murada ümumiyyətlə heç bir matçda şans verməyib. Əvvəlki görüşlərdə son dəqiqələrdə meydana çıxan Fərid də “Adanaspor”la qarşılaşmanın iştirak ərizəsində yer almamışdı.
