16 sentyabr 2013 19:09
Eddi İsrafilov Azərbaycan yığmasında oynamaq istəyir
İspaniyanın “Real Mursiya” klubunun yarımmüdafiəçisi Eddi İsrafilov Azərbaycan yığması ilə bağlı fikrini dəyişib. Azerisport.az xəbər verir ki, o, millimizin heyətində oynamaq istəyir.
Bu barədə İspaniya mətbuatı məlumat yayıb. “ZoomNews” portalının yazdığına görə o, millimizdən alacağı təklifi qəbul etməyə hazırdı: “Gözlənildiyi kimi, Eddi öz seçimini Azərbaycan yığmasının xeyrinə etdi. Ötən mövsüm onu anasının vətəni olan bu ölkənin yığmasına çağırsalar da, İsrafilov bu təklifdən “Real Mursiya”nın ikinci diviziona düşmək təhlükəsi olması səbəbindən imtina etmişdi. Onun komandası Sequndadakı yerini qoruduğu üçün Eddi indi Azərbaycan yığmasında çıxış etməyi hədəfləyir”.
Yazıda həmçinin 21 yaşlı yarımmüdafiəçinin artırdığı da bildirilir: “Bir qədər də artıracağı halda, o, komandanın aparıcı futbolçusuna çevriləcək. İspaniya klubları ilə yanaşı bir sıra xarici klublar da Eddiyə böyük maraq göstərirlər. Amma o, “Real Mursiya”da qalmaq arzusunda olduğunu bildirib”.
Qeyd edək ki, İsrafilov bu mövsüm “Real Mursiya”nın ilk dörd oyununun hamısında start heyətdə meydana çıxıb. “Rekreativo”ya 2:3 hesabıyla uduzan bu komanda “Malyorka”ya 4:2, “Deportivo”ya 1:0 hesabıyla qalib gəlib. “Ponferradino” ilə görüşdə isə sülh qeydə alınıb – 2:2. 5-ci turun “Alaves”lə oyununda (2:1) isə İsrafilov ehtiyatda qalıb.
Qeyd edək ki, AFFA İsrafilovla maraqlandığını bəyan etsə də, sonradan Eddinin millimizdə oynamaq üçün 500 min avro istəməsini bildirərək, ondan imtina etmişdi. Baxmayaraq ki, futbolçu sonradan bunu təkzib etmiş, imtinasının səbəbinin yalnız komandasının ağır oyunlarının olması ilə əlaqələndirmişdi.
