18 sentyabr 2013 17:05
Sumqayıt – Neftçi matçının keçirilmə yeri dəyişdirildi
Topaz Premyer Liqasının 7-ci turunun “Sumqayıt” – “Neftçi” matçının keçirilmə yeri dəyişdirilib. Azerisport.az xəbər verir ki, bu barədə Peşəkar Futbol Liqasının yaydığı məlumatda bildirilir.
Həmin məlumatı olduğu kimi təqdim edirik:
“Sumqayıt” klubu PFL-ə müraciət edərək ev oyunlarını keçirdikləri stadionda infrasturuktur işlərinin yekunlaşmaması ilə əlaqədar olaraq Topaz Premyer Liqasının 1-ci dövrəsinin “Sumqayıt” – “Neftçi” matçının “Bakcell Arena” stadionunda, ikinci dövrənin matçının isə Sumqayıt şəhərində keçirilməsinə icazə verməyi xahiş edib. Bu səbəbdən də yuxarıda qeyd olunanları və “Neftçi” klubunun razılıq məktubunu nəzərə alaraq Peşəkar Futbol Liqasının prezidenti Ramin Musayev əmr imzalayıb:
- Topaz Premyer Liqasının 7-ci turunun “Sumqayıt” – “Neftçi” matçı 22 sentyabr 2013-cü il tarixindən 21 sentyabr 2013-cü il tarixinə dəyişdirilsin və matç “Bakcell Arena” stadionunda keçirilsin.
- Topaz Premyer Liqasının 15-ci turunun “Neftçi” – “Sumqayıt” matçı Mehdi Hüseynzadə adına Sumqayıt şəhər stadionunda keçirilsin.
