21 sentyabr 2013 12:08
Platini: Bakının AÇ-2020 şansları haqda danışmaq hələ tezdi
UEFA prezidenti Mişel Platini Bakının AÇ-2020 şansları haqqında öz fikrini bildirib. Azerisport.az xəbər verir ki, o, bununla yanaşı Azərbaycan prezidenti İlham Əliyevlə görüşünü də qeyd edib:
“Şanslar haqda danışmaq hələ tezdi. Biz əminik ki, AFFA bu məqsədə çatmaq üçün böyük işlər görəcək və bizə tam hesabat verəcək. AÇ-2020-nin oyunlarını qəbul edəcək şəhərlərin tam siyahısı gələn ilin sentyabrında elan ediləcək. Bakı AÇ-ni keçirmək üçün təsdiqlənmiş namizədlər siyahısından ilk şəhər oldu. Ancaq şanslar haqda danışmaq hələ tezdi”.
UEFA rəhbəri ölkə prezidenti İlham Əliyevlə görüşünə də toxunub: “Sizin prezident futbolu çox sevir. Onunla görüşmək və söhbətləşmək xoş idi. O, öz ölkəsinin yığmasını dünya çempionu görmək istəyir. Ancaq bu, asan deyil. Gənc oyunçular, onlar üçün baza olmalıdı. Mən əminəm ki, bu yeni baza yeni futbolçular yetişdirməyə kömək olacaq”.
Platini həmçinin qeyd edib ki, əvvəlki kimi İstanbulun namizədliyini dəstəkləyəcək: “İstanbuldan fərqli Bakı yarımfinallar və finala iddia etmir. Bundan başqa, mən bildirmişəm ki, İstanbula yarımfinallar və finalın keçirilmə yeri kimi səs verəcəyəm. Amma tək mənim səsim hər şeyi həll etmir. Bakı isə qrup mərhələsi uğrunda 25 şəhərlə rəqabət aparır”.
