22 sentyabr 2013 12:15
Quliyevin yeni baş məşqçisi müəyyənləşdi (FOTO)
Türkiyənin “Kahramanmaraşspor” klubunun yeni baş məşqçisinin adı müəyyənləşib. Azerisport.az xəbər verir ki, sözügedən komandanı bundan sonra Yılmaz Özlem çalışdıracaq.
Qeyd edək ki, son turdakı məğlubiyyətdən sonra “Kahramanmaraşspor” Besim Durmuşla yollarını ayırmışdı. Komandanın geridə qalan turlarda cəmi 1 xal toplaması və sonuncu pillədə getməsi rəhbərliyin yeni baş məşqçi axtarışına çıxmasını labüd etmişdi. Artıq yeni baş məşqçi Yılmaz Özlem olacaq. Onunla rəsmi müqavilə də imzalanıb. Klub prezidenti Ferudun Kolat keçmiş futbolçu olan Özlem ilə daha böyük uğurlar qazanacaqlarına inamını ifadə edib.
Artıq yeni baş məşqçi “Kahramanmaraşspor”da işə başlayıb. Bütün komanda üzvləri ilə tanış olduqdan sonra o, futbolçuları psixoloji cəhətdən hazırlamağa xüsusi önəm verir. Bu gün “Orduspor”la qarşılaşacaq Kahramanmaraş təmsilçisi uğursuz gedişata son qoymağa və yeni baş məşqçisinin debüt matçında müsbət nəticə qazanmağa çalışacaq.
Qeyd edək ki, “Kahramanmaraşspor”da azərbaycanlı futbolçu Fərid Quliyev də çıxış edir. Besim Durmuşun dəvəti ilə bu kluba keçən, lakin onun rəhbərliyi altında o qədər də çox forma şansı qazanmayan futbolçumuzun yeni baş məşqçinin dövründə hansı aqibəti yaşayacağı maraq doğurur. Onun bu gün millimizin hücumçusu Branimir Subaşiçin forma geydiyi “Orduspor”la görüşdə meydana çıxıb-çıxmayacağı isə sual altındadı.
