23 sentyabr 2013 12:37
“Hakimin niyə belə qərar qəbul etməsini sonadək anlaya bilmədim”
“İnter”in gürcüstanlı müdafiəçisi Laşa Salukvadze klub saytına müsahibəsində “Bakı” ilə matç (2:2) barədə təəssüratlarını açıqlayıb, görüşün bəzi mübahisəli epizodları barədə danışıb və digər suallara cavab verib.
- Laşa, “Bakı” ilə matç kifayət qədər mürəkkəb alındı. Oyun haqqında fikirlərinizi bilmək istərdik...
- Anlayardıq ki, bizə məğlub olmaq olmaz. Komanda turnir cədvəlində son yerdədi və bu vəziyyət xal toplamağa zərurət yaradırdı. Hakimlik barədə danışmaq istəmirəm. Lakin qapımıza 11 metrlik cərimə zərbəsinin və ikinci qolun vurulmasına gətirib çıxaran mübahisəli anlara toxunmaya bilmərəm. Buna baxmayaraq, oyun çox əzmkar alındı. Biz uzun müddət hesabda geridə qaldıq. Lakin hesabı bərabərləşdirə bildik. Oyunun sonunda isə önə keçmək üçün şansımız da oldu.
- İkinci qol zamanı yan xətt hakimi rəqibin qaydanı pozduğunu göstərdi. Lakin matçın baş hakimi topu “Bakı”ya verdi və qaydanın siz tərəfdən pozulduğunu göstərdi...
- Bəli, məhz belə oldu. Yan xətt hakimi mənə qarşı qaydanın pozulduğunu görərək bayrağı qaldırmışdı. Amma həmin epizoda yan xətt hakimindən daha uzaq olan baş hakim bunun əksini göstərdi. Onun fikrincə, qaydanı məhz mən pozmuşdum. Yan xətt hakimi həmin epizodu daha yaxşı görmüşdü və baş hakimin nəyə görə başqa qərar qəbul etməsi mənə aydın deyil. Mən sonadək anlamadım, niyə referi məhz belə addım atdı.
- Yeri gəlmişkən, bu, sizin ilk turda aldığınız zədədən sonra ilk oyununuz idi. Meydana qayıtmaq çətin olmadı?
- Etiraf edim ki, çətin idi. Mən hələ sonadək formamı yığmamışam. Oyunun gedişində müəyyən ağrılar hiss edirdim və məhz buna görə də matçın sonunda səhvə yol verdim. Ancaq inanıram ki, növbəti oyunlarda özümü daha yaxşı hiss edəcəyəm və komandaya kömək edə biləcəyəm.
- “Bakı” ilə matçda “İnter”in baş məşqçisi Kaxaber Sxadadze özündə üç mərkəz müdafiəçisini ehtiva edən taktiki düzülüşü seçmişdi. Bu sxemə uyğun davranmaq necə idi?
- Bir qədər qeyri-adiydi. Axı biz bir-birimizi yüz faiz tanımırıq. Ancaq hesab edirəm ki, növbəti oyunlarda qarşılıqlı anlaşma daha yaxşı olacaq. Baş məşqçi necə oynamağı daha yaxşı bilir. O, belə oynamağın zəruri olduğunu hesab edirsə, deməli, belə taktiki sxem bizə daha çox fayda verəcək.
- Mövsümün startı “İnter” üçün çox uğursuz alındı. Komanda çətin vəziyyətdən çıxmağı və turnir cədvəlinin yuxarısında öz yerini tapmağı bacaracaqmı?
- Biz bu vəziyyətdən mütləq çıxacağıq. “İnter” həmişə yüksək yerlər uğrunda mübarizə aparır və irəlidə belə də olacaq. Sadəcə futbol elədi ki, belə uğursuzluq seriyaları olur və heç kim bundan sığortalanmayıb. Komandamız mütləq özünü tapacaq və azarkeşlərini sevindirəcək.
