27 sentyabr 2013 00:01
Bakı ilə Lans əməkdaşlıq müqaviləsi imzaladı
“Bakı” ilə Fransanın “Lans” klubu arasındakı işbirliyi yeni müstəviyə qədəm qoymaqdadı. Azerisport.az xəbər verir ki, bu işlərin məntiqi davamı olaraq ötən gün Parisdə klublar arasında əməkdaşlıq sazişi imzalanıb.
Fransanın paytaxtında keçirilən ənənəvi beynəlxalq turizm sərgisində Azərbaycanın idman sektorunu təmsil edən klubumuzun "Lans"la əməkdaşlıq müqaviləsinin imza mərasiminin məhz bu məkanda baş tutması da təsadüfi deyil. Tədbiri Azərbaycanın Fransadakı səfirinin müşaviri Elmar Məmmədov açıb. Cənab Məmmədov Azərbaycan və Fransanın müxtəlif sahələrdə uğurla əməkdaşlıq etdiyini bildirərək, bu əlaqələrin hər iki ölkə üçün böyük əhəmiyyət daşıdığını ifadə edib. "Bakı" futbol klubunun bu baxımdan önəmli müqavilə imzalamasını yüksək dəyərləndirən diplomat əməkdaşlığın xalqlarımız arasında əlaqələrin daha da güclənməsinə xidmət edəcəyini bildirib.
Ardından söz alan “Bakı” futbol klubunun icraçı-direktoru Yaşar Seyidov azərbaycanlı yeniyetmə futbolçuların Fransada çıxışının ölkə üçün xüsusi önəmini və gələcəkdə onların müxtəlif yaş qruplarından ibarət yığmaya da fayda verəcəyini diqqətə çatdırıb.
“Lans” klubunun prezidenti Jerve Martel çıxışı zamanı bu yöndə “Bakı"ya dəstək veriləcəyini və bunun hər iki ölkə futbolu üçün vacibliyini vurğulayıb. Həmçinin, o, bu günlərdə UEFA prezidenti Mişel Platininin Bakıya səfərinə diqqət ayıraraq Azərbaycanda futbolun inkişafına ciddi önəm verildiyini ifadə edib.
Daha sonra "Bakı" və "Lans" klubları arasında əməkdaşlıq sazişi imzalanıb. Sonda klub rəsmiləri və futbolçular xatirə şəkli çəkdiriblər.
Sonda onu da əlavə edək ki, təntənəli mərasimdə Fransa futbolunun ulduz futbolçuları Jan Pyer-Papen, Olivye Dakurla yanaşı veteran futbolçumuz, olimpiya çempionu İqor Ponomoryov da iştirak edib.
