5 oktyabr 2013 00:41
Hafiz Məmmədov: Bakı indi daha maraqlı futbol nümayiş etdirir
“Bakı” hər zaman çempionluğa oynayıb. Düzdü, ötən çempionat işimiz bir az alınmadı. Amma onu passivlik kimi yozmaq düzgün olmaz”. Bunu azerisport.az saytına açıqlamasında “Bakı” futbol klubunun prezidenti Hafiz Məmmədov deyib.
Tanınmış iş adamı bildirib ki, keçən mövsüm nəticənin qənaətbəxş olmaması cari mövsümə hazırlaqla bağlı olub: “Əvvəlki illərdə əsasən legionerlərə güvənirdik. Bu mövsüm isə, üstünlüyü yerli futbolçulara vermişik. Əfran İsmayılov, Cavid Hüseynov, Rauf Əliyev və Kamran Ağayev aparıcı futbolçularımızdandı”.
“Bakı”nın prezidenti onu da qeyd edib ki, artıq çətin günlər arxada qalıb. İndi vəziyyət xeyirə dəyişib: “Komandada dönüş yaratmışıq. Yaxşı heyətimiz var. Oyun üslubumuz da dəyişib. Daha maraqlı futbol nümayiş etdiririk”.
Məmmədov yeni transferlərin olacağına da işarə vurub: “Hələ işlərin 25 faizi görülüb. Qışda, yayda da transferlərimiz olacaq. Baş məşqçi Milinko Pantiçin gəlişi də böyük nailiyyətdi. İnanıram ki, bu dəfə Avropa meydanlarında öz sözümüzü deyəcəyik”.
