8 oktyabr 2013 11:45
Vaqif Cavadov: Ruslan Abışov özünə inansın, hər şey yaxşı olacaq
Millimizin futbolçusu Vaqif Cavadov karyerasını Rusiyanın Rubin klubunda davam etdirən həmyerlimizin Ruslan Abışov haqda danışıb. Azerisport.az xəbər verir ki, Cavadov Ruslanın tezliklə Kazan təmsilçisinin əsas heyət oyunçusu olacağına ümid etdiyini deyib:
“Ruslan avrokubok matçında ilk dəfə start heyətdə meydana çıxdı və yaxşı təsir bağışladı. Əlbəttə, müqayisə etdikdə Rusiya çempionatı tam fərqli yarışdı. Bu mənada Ruslan daim üzərində işləməli və geri çəkilməməlidi. Ola bilər mətbuatda bəzi yazılar ona təsir etsin. Özüm Rusiyada oynayanda daim haqqımda çıxan yazılara biganə deyildim. Mətbuat hər zaman Ruslanı start heyətdə görmək istəyir və hər oyun haqda qeyd aparır. İstərdim ki, bu hallar Abışova təsir etməsin. O bilir ki, Azərbaycanda onun karyerasını diqqətdə saxlayılar. Ona görə də özünə inansın. Hər şey yaxşı olacaq və tezliklə daha çox oynamağa imkan tapacaq”.
