10 oktyabr 2013 13:04
“Şimali İrlandiya üzərində qələbə gözləyirəm”
Futbol üzrə Azərbaycan yığmasının baş məşqçisi Berti Foqts DÇ-2014-ün seçmə mərhələsi çərçivəsində Şimali İrlandiyaya qarşı keçiriləcək oyun öncəsi fikirlərini açıqlayıb. Azerisport.az xəbər verir ki, almaniyalı mütəxəssis öncə bunları dilə gətirib:
“Komandanın Şimali İrlandiya ilə oyuna hazırlığından razıyam. Hava da gözəldi. Mətbuatda yazıblar ki, biz hazırlığa çox tez başlamışıq. Amma bu, belə deyil. Biz böyük futbol ölkələrini cəmi bir gün qabaqlamışıq. Heyətlə bağlı müəyyən problemlərimiz var. Bildiyiniz kimi, Ruslan Abışov cəzalı olduğundan, oyunu buraxacaq. Vaqif Cavadovun da kiçik zədəsi var”.
“Ruslanı kim əvəzləyəcək? Hər şey son məşqdən asılı olacaq. Mümkündü ki, dörd yarımmüdafiəçi ilə oynayaq. Cavid Hüseynovun oyunu son vaxtlar xoşuma gəlir. Düzdü, Ruslan komandamız üçün çox vacib oyunçudu. Onun bir qədər sürəti də olsaydı, daha gözəl olardı”.
Foqts rəqib komandadan da danışıb: “Rəqibi yaxşı tanıyırıq. Həm güclü, həm də zəif cəhətlərini bilirik. Onlar sərt oyuna üstünlük verirlər. “İkinci mərtəbədə” yaxşı təsir bağışlayırlar. Futbolçularıma bu komanda barədə kifayət qədər informasiya vermişəm. Şimali İrlandiya üzərində qələbə gözləyirəm. Rəşad Sadıqovun İsraildəki kimi oynamasıını gözləyirəm. Həmin oyunda kapitan əsl liderlik keyfiyyətlərini göstərmişdi. Komanda üzərində təzyiq var. Ama ümid edirəm ki, heç bir problemlə üzləşmərik”.
Foqts yaradılan qol vəziyyətlərindən lazımınca yararlana bilməməyimizi də qabardıb: “Futbolçular başa düşməlidilər ki, onları Premyer Liqa oyunları gözləmir. Çempionatın son oyunlarını izləmişəm. Hücumlar çoxdu, qol vəziyyətləri də. Amma onları dəyərləndirmək baxımından böyük problem var. Biz bunun üzərində çalışmalıyıq. Çünki Avropa səviyyəli oyunlarda qol vəziyyətlərindən maksimum yararlanmayan cəzalandırılır”.
Alman məşqçi start heyətini açıqlamaqdan imtina edib: “Bunu məndən gözləməyin. Start heyətini indi açıqlaya bilmərəm. Əgər öz aramızda qalsaydı, deyərdim. Amma jurnalistləri yaxşı tanıyıram. Ağzını açan kimi beş dəqiqə sonra hər şey mətbuatda olur”.
Foqts “Rüfət Dadaşov Azərbaycan Premyer Liqasında oynaya bilər” sualına belə cavab verdi: “Mən oyunçunun meneceri deyiləm. Bəs siz onu həqiqətən Azərbaycan Premyer Liqasında görmək istəyirsiz”?
Yığmamızın çalışdırıcısıs sonda Azərbaycanın bu seçmə mərhələdə qələbə qazanıb-qazanmayacağına münasibət bildirdi: “Sizə bu barədə Rusiya ilə oyundan sonra dəqiq cavab verə bilərəm”.
