11 oktyabr 2013 01:14
Qarabağda ayrılıq
“Qarabağ”ın aşağı yaş qruplarının idarə sistemində dəyişiklik baş verib. Azerisport.az xəbər verir ki, Ağdam klubunun aşağı yaş qruplarının texniki koordintoru Sebahettin Tekin işindən ayrılıb.
Türkiyəli mütəxəssis 2 il aşağı yaş qruplarında futbolçu yetişdirilmə işinə nəzarət edirdi. O, ailəsində yaranmış problemlərlə əlaqədar olaraq klub rəhbərliyinə ayrılmaq istədiyini bildirib. Klub rəhbərliyi durumu anlayışla qəbul edərək Tekinin ərizəsini qəbul edib.
Sebahettin Tekin istefasından sonra klubun rəsmi saytına danışıb: “2 ildi “Qarabağ”da çalışıram. Həqiqətən, burda unudulmayacaq vaxtlar keçirmişəm. 2 il boyunca “Qarabağ”a şərəflə və sevgiylə xidmət etdik. “Qarabağ”ın özəl bir klub olduğunu anlamaq üçün burda 1 gün keçirmək belə kifayətdi. İnanıram ki, “Qarabağ”ın uşaq futbolunun inkişafı üçün nələrsə etməyi bacarmışam. “Qarabağ”da rəhbərlikdən tutmuş ən sıravi işçiyə kimi hər kəs işinə sevgi və məsuliyyətlə yanaşır. Rəhbərlik uğur qazanmaq üçün lazım olan hər bir şeyi etməyə çalışır. Burda olduğum müddətdə ancaq xoş xatirələrim yadımda qalıb. Təəssüf ki, ailəvi səbəblərdən dolayı ayrılmaq məcburiyyətində qaldım. Sağ olsun, məni anlayışla qarşıladılar. Düzdü, artıq buranı tərk edirəm. Amma hər zaman “Qarabağ”ın azarkeşi olaraq qalacam. “Qarabağ”a hər zaman uğurlar arzulayıram”.
