11 oktyabr 2013 13:56
Elxan Abdullayev: Berti Foqts oyunçuları elə kökləməlidi ki...
Futbol üzrə Azərbaycan yığmasının sabiq məşqçisi Elxan Abdullayev millimizin bu gün DÇ-2014-ün seçmə mərhələsi çərçivəsində Şimali İrlandiyaya qarşı keçirəcəyi oyun barədə fikirlərini açıqlayıb. Azerisport.az saytına müsahibəsində o, bunları dilə gətirib:
“Yığmamızın bu oyununun necə alınacağını deyə bilmərəm. Amma nəyəsə nail ola bilməsək, çox acınacaqlı olacaq. Məşqçilərdən tutmuş futbolçusuna qədər millinin hər bir üzvü necə böyük məsuliyyət daşıdıqlarını anlamalıdılar. Yığmamız hazırda sonuncu pillədə qərarlaşıb. Mümkün qələbə həm Lüksemburqu, həm də Şimali İrlandiyanı qabaqlamağımıza səbəb ola bilər. Şimali İrlandiya Rusiya və Portuqaliya qədər güclü rəqib deyil. Ona görə də biz bu oyunda üç xal qazana bilərik. Belfastdakı qarşılaşma yığmamız üçün çətin alınmışdı. Rəqib daha üstün futbol sərgiləmişdi. Şəxsən həmin görüşdə yığmamızın sərgilədiyi oyun mənim xoşuma gəlməmişdi. Doğma divarlar arasında isə Azərbaycan millisi həmişə daha güclü oyun sərgiləyir. Burdakı oyunda artıq daha çox psixoloji amillər önəmli rol oynayacaq. Fikrimcə, hər şeydən çox futbolçuların özlərinə inanması lazımdı. Foqts oyunçuları elə kökləməlidi ki, onların hər biri uğur qazanacağına tam inanmalıdı. Şimali İrlandiya qeyri-sabit oyun sərgiləyir. Bu da rəqibin problemlərinin olmasından xəbər verir. Amma onu da unutmaq olmaz ki, britaniyalıların güclü xarakteri, öz oyun üslubları var. Bizdə isə “ikinci mərtəbədə” müəyyən problemlər yarana bilər. Bu oyunda daha çox yük müdafiənin üstünə düşəcək. Qonaqların da itiriləsi heç nəyi qalmayıb, onlar da son oyunlarına çıxırlar. Şimali İrlandiya da başa düşür ki, uduzsa, qrup sonuncusu ola bilər. Ona görə də maksimum diqqətli olmalıyıq”.
