14 oktyabr 2013 14:30
“Rəşad Sadıqov haqlıdır: milyonlar bərabər mübarizəyə kömək edə bilməz”
“Neftçi”nin vitse-prezidenti Tahir Süleymanov dünya çempionatının seçmə mərhələsi çərçivəsində Azərbaycan - Rusiya oyunu ilə bağlı fikirlərini bildirib. Azerisport.az xəbər verir ki, o, bunları söyləyib:
(mükafatlar haqda)
Mən “Neftçi”nin oyunçuları barədə qətiyyətlə deyə bilərəm ki, onlar mükafatlar barədə deyil, ilk olaraq Azərbaycanın himni, bayrağı haqda düşünür. Mətbuatda səslənən rəqəmlər məncə çox şişirdilib. Futbolçular vətənləri üçün oynayacaqlar, pul üçün yox. Sözsüz ki, hər bir komandaya qarşıya qoyulmuş məqsədə çatdıqda hər hansı mükafat təyin edilir. Rusiya yığması da yerinə yetirilmiş vəzifəyə görə mükafat alacaq. Bu, ümumdünya təcrübəsidi. Amma məncə, indi pullar haqda deyil, futbolçuların Çərşənbə axşamı göstərəcəkləri oyunun keyfiyyəti barədə danışmaq lazımdır.
Təbii ki, istəyirik ki, yığmamız qələbə qazansın. Digər tərəfdən, biz uzun müddət bir bayraq altında çıxış etmişik, böyük bir ölkənin vətəndaşları olmuşuq və şəxsən mən Rusiya yığmasının qrup birincisi kimi dünya çempionatına çıxmasını istəyirəm. Yeri gəlmişkən, mükafatlara gəlincə, Azərbaycan yığmasının kapitanı Rəşad Sadıqov mətbuatda fikrini düzgün bildirib. O deyib ki, milyonlar versələr də, əgər o, səviyyəli oynaya bilməsə, pullar kömək etməyəcək.
(futbolun maliyyələşdirilməsi haqda)
Azərbaycanda idmanın, xüsusi ilə futbolun inkişafına dövlət və ayrılıqda futbola vəsait ayıran sponsorlar tərəfindən kifayət qədər çox diqqət ayrılır. Buna görə də klublarda oyunçular mükafatlar alırlar. Ancaq mən qeyd etmək istərdim ki, bizim futbolçular “Spartak”, “Rubin”, “Zenit”in oyunçularının mükafatları kimi mükafatlar alsın. Bütün dünyada olduğu kimi oyunçuları qarşıya qoyulmuş məqsədə həvəsləndirə biləcək sponsorlar var.
(Rusiya ilə oyun barədə)
Ümumiyyətlə Azərbaycanda Rusiyaya hörmətli münasibət var. Bizim bir çox həmvətənlərimiz Rusiyada yaşayır, işləyirlər. Sizi əmin edirəm ki, məhz mətbuatdakı informasiya oyun öncəsi gərginlik yaradır və bunun heç bir tutarlı əsası yoxdur. Tamaşaçılar stadiona gələcəklər və Azərbaycan yığması ilə bərabər gözlə oyuna azarkeşlik edəcəklər. Mən əminəm ki, Rusiya ya Portuqaliyanın dünya çempionatında iştirakı ilə bağlı sorğu keçirilsə, 90 faiz azarkeş Rusiyaya səs verərlər.
