Qarabağ üçün son addım - ya ölüm, ya qalım!
Bu gün Avropa Liqasında qrup mərhələsinə yekun vurulacaq. Azerisport.az xəbər verir ki, Azərbaycanın qitənin nüfuzuna görə ikinci dərəcəli klub turnirindəki yeganə təmsilçisi - son çempion "Qarabağ" da növbəti sınağına çıxacaq.
Xatırladaq ki, Ağdam klubu bu mövsüm avrokuboklar macərasına Çempionlar Liqasının ikinci təsnifat mərhələsindən başlayıb. Bölgə təmsilçisinin startdakı rəqibi Malta "Valletta"sıydı. "Qarabağ" bu rəqibini səfərdə 1:0, Bakıda isə 4:0 hesabı ilə üstələyərək, adını növbəti mərhələyə yazdırdı. Üçüncü təsnifat mərhələsində isə təmsilçimiz Avstriya "Zalsburq"una uduzaraq (2:1, 0:2), ÇL ilə vidalaşdı. Lakin qaydaya görə, ÇL-in pley-off mərhələsinə vəsiqə qazana bilməyən klublar mübarizəni Avroliqanın eyni mərhələsində davam etdirmək şansına malik idi. Çempionumuz məhz bu mərhələdə ünlü Hollandiya "Tvente"si ilə çətin sınaqdan üzüağ çıxaraq (evdə 0:0, səfərdə 1:1), tarixində ilk dəfə adını qrup mərhələsinə yazdırdı.
"Qarabağ"ın qrup mərhələsindəki rəqibləri İtaliya "İnter"i, Fransa "Sent-Etyen"i və Ukrayna "Dnepr"idi. İlk turdakı rəqib Fransa təmsilçisi idi. Bakıdakı həmin oyunda ağdamlılar "Sent-Etyen"dən daha yaxşı oynasa da, qolsuz heç-heçəyə razılaşmalı oldu. Digər "böyük beşlik" ölkəsi təmsilçisi - "İnter"lə görüşdə isə komandamız 0:2 hesablı məğlubiyyətlə üzləşdi. Ağdam təmsilçisi qrupundakı nəhənglərlə müqayisədə nisbətən zəif olan rəqiblə - "Dnepr"lə səfər qarşılaşmasında isə böyük bir sürprizə imza ataraq 1:0 hesablı qələbəyə sevindi. Təəssüf ki, sözügedən komanda ilə ev oyununda eyni uğuru təkrarlamaq mümkün olmadı və ağdamlılar 1:2 hesablı yenilgi ilə üzləşdilər. "Sent-Etyen"lə səfərdəki oyun da heç-heçə başa çatdı - 1:1. Amma məhz səfərdəki qollu heç-heçə Ağdam klubu üçün qələbəyə bərabər oldu və təmsilçimiz qrupda ikinci yerə çıxdı. İndi isə "Qarabağ"ı qrup mərhələsindəki son sınağında "İnter"lə ev oyunu gözləyir.
Sözsüz ki, təmsilçimizin rəqibləri arasında ən adlı-sanlısı məhz "İnter"di. Maraq üçün bildirək ki, milanlılar Avroliqanın qrup mərhələsində bundan öncə bir dəfə Azərbaycan klubuna rəqib olmuşdu. 2 il bundan öncə "Neftçi" ilə eyni qrupda yer alan "İnter" Bakıda "ağ-qaralar"ı 3:1 hesabı ilə məğlub etsə də, doğma azarkeşləri önündə bunu təkrarlaya bilməmişdi - 2:2. "Qarabağ" isə səfərdə məğlub olduğu bu rəqibinə mütləq qalib gəlməlidir.
Ölkəsinin və dünyanın ən nüfuzlu klublarından olan "İnter" 1908-ci il martın 9-da yaradılıb. İtaliya klubunun rəngləri mavi və qaradı. Bu rənglər klubun yarandığı ildən bu yana "İnter"in formasında öz əksini tapır. 18 dəfə İtaliya çempionu olan "İnter" 7 dəfə də ölkə kubokuna yiyələnib, 5 dəfə İtaliya Superkubokunu qazanıb. 3 dəfə UEFA Çempionlar Liqasının, 3 dəfə UEFA Avropa Liqasının, 1 dəfə UEFA Superkubokunun qalibi olan bu klub 1 dəfə də FİFA Klublararası Dünya çempionatının baş mükafatına sahib çıxıb.
Klubun prezidenti indoneziyalı iş adamı Erik Tohir, baş məşqçisi isə Roberto Mançinidir. O, bir müddət öncə istefaya göndərilən Valter Matsarinin yerinə gəlib. Hansı ki, Milandakı ilk oyunda rəqibin sükanı arxasında məhz Matsari yer alırdı. Bakıdakı oyunda isə "İnter"ə köhnə-yeni baş məşqçisi Mançini rəhbərlik edəcək. İllik gəliri 455 milyon avroya yaxın olan "İnter" ötən il ölkə çempionatını 5-ci pillədə başa vurduğu üçün Avropa Liqasının pley-off mərhələsindən mübarizəyə qoşulub. Bu mərhələdə İslandiya "Styarnan"ı ilə qarşılaşan italyanlar səfərdə 3:0, doğma meydanda 6:0 hesabıyla qalib gələrək, qrup mərhələsinə yüksəliblər. Milanlılar geridə qalan mövsümdə keçirilən 38 oyunun 15-də meydanı qalib, 8-də isə məğlub kimi tərk edib. Komanda qazandığı qələbələrin sayı qədər də heç-heçə edib. Ötən mövsüm rəqib qapılarından 62 top keçirən Valter Matsarinin yetirmələri öz qapısında 39 qol görüb. 2013/14 mövsümündə "İnter" çempion olan "Yuventus"dan nə az, nə çox, düz 42 xal geri qalıb.
Bu mövsümdə isə komanda Avroliqadan fərqli, A Seriyasında uğursuz çıxışı ilə diqqət çəkir. Geridə qalan 14 turda cəmi 4 qələbəsi olan milanlılar 5 görüşdə heç-heçə ilə kifayətləniblər, eyni sayda da məğlubiyyətlə üzləşiblər. Bu komanda Avroliqanın qrup mərhələsində "Sent-Etyen"lə hər iki görüşdə sülh bağlayıb (evdə 0:0, səfərdə 1:1). "Dnepr"ə isə səfərdə 1:0, evdə 2:1 hesabıyla qalib gələn milanlılar "Qarabağ" üzərindəki qələbə ilə birgə 11 xal toplayıb və son turun nəticəsindən asılı olmayaraq, növbəti mərhələyə vəsiqəni təmin edib. Məğlubiyyəti olmayan "İnter"ə ilk belə acını Azərbaycan çempionu yaşatdıra bilər.
Çünki komandamızın növbəti mərhələyə vəsiqə qazanmaq üçün buna çox ehtiyacı var. "Qarabağ" hazırda F qrupunda 5 xala malikdi. Ağdamlılar Milan klubuna məğlub olsa, növbəti mərhələyə adlaya bilməyəcəyi dəqiqdir. Belə olan halda F qrupunun ikincisi "Dnepr" (4 xal) - "Sent-Etyen" (5 xal) cütünün qalibi olacaq. Həmin oyunda heç-heçə qeydə alınacağı halda isə, fransızlar pley-offa vəsiqə qazanacaq.
"Qarabağ" "İnter"lə sülh bağlasa, o zaman digər oyunda da heç-heçə qeydə alınmasını arzulayacaq. O zaman bütün komandalar öz yerində qalacaq ki, şəxsi oyunlardakı göstəricilərinə görə, ağdamlılar "Sent-Etyen"i qabaqlayacaq. "Qarabağ" sülh bağlasa, digər oyunda qalib gələn gülən tərəf olacaq. "Qarabağ" "İnter"ə qalib gələcəyi təqdirdə isə, digər oyunun nəticəsindən asılı olmayaraq, pley-offa məhz Azərbaycan çempionu vəsiqə qazanacaq.
Bu üzdən də komandamızın "İnter"lə oyunda uğur qazanması üçün daha böyük güc sərf etməsinə ehtiyac var. Qurban Qurbanovun yetirmələri maksimum diqqətli oynamaqla, ələ düşən qol fürsətlərinin hər birini dəyərləndirməklə sürpriz nəticəyə imza ata bilər. Komandamızın üzvləri bu tarixi qarşılaşmanın məsuliyyətini yaxşı anlamalı və meydanda var güclərini qoymalıdılar. Düzdü, heyətində Reynaldo, Danilo Dias, Çumbinyo kimi ciddi itkiləri olan "Qarabağ" onsuz da böyük uğura imza atıb, qrup mərhələsində ən çox xal toplayan təmsilçimiz kimi tarix yazıb. Amma ilklərə imza atmağa davam etmək üçün qrupdan çıxmaq kimi tarixi şansı dəyərləndirmək də vacib əhəmiyyət daşıyır.
Sonda onu da bildirək ki, "Qarabağ"ın Avroliqada qazandığı istənilən uğur Azərbaycanın UEFA-dakı klub reytinqinə də təsirsiz ötüşmür. Belə ki, Ağdam klubunun hər bir qələbəsi ölkəmizə 0,500, heç-heçə isə 0,250 reytinq xalı qazandıracaq. Hazırda Azərbaycan UEFA reytinqində 53 ölkə arasında 29-cu pillədədi və hesabında 12.250 reytinq xalı var. Bunun 3.375 xalı cari mövsümdə qazanılıb (2.000 xal "Qarabağ"ın, 0.750 xal "İnter"in, qalan 0.625 xal isə "Neftçi"nin sayəsində əldə olunub).
"Qarabağ" hazırda UEFA-nın klub reytinqində 10.450 xalla 158-cidir. "İnter" isə 71.102 xalla 23-cü pillədə qərarlaşıb.
Qeyd edək ki, F qrupu çərçivəsindəki digər oyunda "Dnepr" "Sent-Etyen"in qonağı olacaq.
Avropa Liqası
F qrupu
11 dekabr
23:45. Qarabağ - İnter
Hakimlər: Miroslav Zelinka, Andrey Pelikan, Jiri Molaçek, Antonin Kordula.
Əlavə hakim köməkçiləri: Petr Ardeleanu, Yan Jilek (Çex Respublikası).
Hakim-inspektor: Ray Ellingam (Uels).
UEFA nümayəndəsi: Gennadi Şkurtul (Moldova).
