Cavid Tağıyev: Reynaldonun yoxluğu hiss olunmurdu
"Qarabağ"ın yarımmüdafiəçisi Cavid Tağıyevin azerisport.az saytına müsahibəsi
- "Xəzər Lənkəran"la oyun (1:0) barədə nə deyə bilərsiniz?
- "Xəzər Lənkəran" yaxşı komandadır. Gənclərdən qurulmuş komandadır. Bu, hiss olunurdu. Amma biz oyunun asan keçməyəcəyini bilirdik. Ona görə də ciddi hazırlaşmışdıq və qələbə qazandıq. Fikrimcə, layiqli qələbə oldu.
- Bəzi epizodlarda "Qarabağ"da son nöqtəni qoyan oyunçu çatışmazlığı hiss olunurdu. Sanki, Reynaldo çatışmırdı...
- Bəli, bəzi epizodlarda gecikirdik. Amma Vüqar Nadirov hücumda yaxşı təsir bağışladı. Reynaldonun yoxluğunu elə də çox hiss etdirmədi.
- "Qarabağ" ancaq avtoqoldan sonra özünə gəldi...
- Yəqin ki, qonaqlar buraxılan qoldan sonra ruhdan düşdülər. Bu da bizə sərf etdi. İkinci hissə başlayan kimi hesab açıldı.
- Qurban Qurbanov fasilədə nə dedi?
- Daha diqqətli oynamağımızı tapşırdı.
- Sizi əsas heyətin üzvlərindən saymaq olar?
- Arxayınlaşmıram. Özümü əsas heyət oyunçusu saymağım düzgün çıxmaz. Belə yanaşmaq olmaz. Daha çox məşq etməliyəm ki, əsas heyətdəki yerimi qoruyum.
- Siz də razılaşırsınız ki, çempionluq mübarizəsi sona kimi "Qarabağ"la "İnter" arasında gedəcək?
- Bəli. Çünki onlar bizə daha yaxındırlar. Xal fərqi altıya bərabərdir. Asan olmayacağını bilirik. Amma xal itirməməyə çalışacağıq.
