Elnur Cəfərov: Əslində daha böyük hesabla qalib gəlməli idik

21 yaşadək futbolçulardan ibarət Azərbaycan yığmasının üzvü Elnur Cəfərov AÇ-2017-nin seçmə mərhələsi çərçivəsində Farer adalarına qarşı keçirdikləri oyunla bağlı fikirlərini bölüşüb. Azerisport.az xəbər verir ki, o, 1:0 hesabıyla qalib gəldikləri görüşü belə şərh edib:

"Oyunun çətin keçəcəyini gözləyirdik. Çünki Farer adaları yığması da uduzmamaq üçün mübarizə aparırdı. Oyunun səfərdə keçməsi də bizim üçün çətinlik yaratdı. Ancaq uşaqlar mübarizədən qopmadılar və sonda istəyimizə çatdıq.

Qrupun güclü komandalarından biri ilə qarşılaşsaydıq, bəlkə də bu qədər çətin olmazdı. Farer adalarının oyunçuları “ikinci mərtəbə”də güclüdür. Əksər oyunçuları ucaboydur. Amma bundan çəkinmədik. Onlara təhlükəli epizodlar yaratmağa imkan vermədik. Həm də başla yaxşı oynadıqlarını nəzərə alıb künc zərbəsi vurmaq şansı qazanmalarına imkan vermirdik.

Onlar çox aqressiv idilər. Hətta buna görə qırmızı vərəqə də aldılar. Səbəbi isə öz meydanlarında oynamaları, xal qazanmaq istəmələri idi.

Birinci hissədə biz üstün tərəf idik. Onlara heç bir şans vermədik. Hesab əslində böyük olmalı idi”.