Nika Kvekveskiri: İnter həm sürətdə, həm də fərdi mübarizələrdə XL-dən geri qaldı

"İnter"in yarımmüdafiəçisi Nika Kvekveskiri Topaz Premyer Liqasının 1-ci turu çərçivəsində "Xəzər Lənkəran"a qarşı keçirdikləri ilk oyunla (0:2) bağlı azerisport.az saytına müsahibə verib.

- İlk turdakı məğlubiyyəti nə ilə izah edə bilərsiniz?
- Bu oyundan bir neçə gün öncə Avropa Liqasının üçüncü təsnifat mərhələsi çərçivəsində İspaniyanın "Atletik" klubu ilə çətin matçımız olmuşdu. Ona görə də tam bərpa prosesi keçə bilməmişdik. Vaxt çox az idi. "Atletik"lə oyunlar bizi yormuşdu. "Xəzər Lənkəran" bizi həm fərdi oyun baxımından, həm də sürətdə üstələdi. Erkən qol isə bizim üçün şok effekti yaratdı. Buna baxmayaraq, yenə də qol vurmaq üçün şansımız var idi. Amma təəssüf ki, bunlardan yararlana bilmədik. Ümid edirəm ki, növbəti oyunlarda belə səhvləri təkrarlamarıq.

- Siz "Xəzər Lənkəran"ın yeni transferlərsiz oynayacağını bilirdiniz?
- Bu komandanın yeni transferlərinin kimlər olduğunu bilmirəm. İstənilən halda bizə qarşı oynayan futbolçuların hamısı sonadək mübarizə apardı. Onlar yaxşı oyun sərgilədilər.

- Növbəti rəqibiniz "Neftçi"dir. Bu qarşılaşmadan nə gözləyirsiniz?
- Səhvlərimizi aradan qaldırmaq üçün əlimizdən gələni edəcəyik. Elə oynamalıyıq ki, uğurlu nəticə qazanaq. Amma bunun asan olmayacağını bilirik. "Neftçi"yə qalib gəlmək üçün maksimum güc sərf etməliyik.

- "Xəzər Lənkəran"la oyun sizin Premyer Liqamızdakı ilk matçınız oldu. Təəssüratlarınız necədir?
- 3-4 turdan sonra Azərbaycan futbolunu daha yaxşı tanıyacağam. Yalnız ondan sonra Azərbaycan və Gürcüstan futbolu arasında müqayisələr apara bilərəm. İndi isə sadəcə onu deyə bilərəm ki, sizdə də bizdəki kimi texnikalı futbolçular çoxluq təşkil edir.

- Sizin Azərbaycanda oynamaqla Gürcüstan yığmasına dəvət almağınız nə dərəcədə realdır?
- Gürcüstan yığmasına dəvət almaq ən böyük arzularımdan biridir. Ümid edirəm ki, bu arzuma çatacağam.